Чемпионати Осиё оид ба бокс дар шаҳри Душанбе

Душанбе, 20.04.2016 /АМИТ «Ховар»/. Бори аввал дар таърихи бокси Тоҷикистон аз 1 то 9 майи соли равон дар пойтахти мамлакат аввалин Чемпионати Осиё оид ба бокс байни донишҷӯён барпо мешавад. Кумитаи ҷавонон, варзиш ва сайёҳии назди Ҳукумати кишвар барои дар сатҳи олӣ гузаронидани ин чорабинии муҳим тамоми шароитро муҳайё карда, онро ба 25-солагии ҷашни Истиқлолияти мамлакат марбут медонад. Дар мусобиқа боксчиён аз давлатҳои Афғонистон, Қазоқистон, Қирғизистон, Муғулистон, Тайланд, Чин, Ҷопон ва Узбекистон иштирок хоҳанд кард.
Баъди сохтани як зумра иншоотҳои варзишӣ, ки ҷавобгӯи меъёрҳои ҷаҳонӣ мебошанд, федератсияҳои байналмилалӣ Тоҷикистонро макони баргузории мусобиқаҳояшон интихоб мекунанд. Рақобатҳо дар толори варзишии Кумитаи андози назди Ҳукумати Ҷумҳурӣ гузаронида мешаванд. Мухлисон метавонанд бо иштирокашон дар ин толор дастаи мунтахаби донишҷӯёни кишварро дастгирӣ намоянд.