Дастовардҳои варзишгарони Хатлон дар се моҳ

Қӯрғонтеппа, 9.04.2016 /АМИТ «Ховар»/. Дар давоми 3 моҳи соли ҷорӣ варзишгарони вилояти Хатлон аз мусобиқаҳои байналмилалию ҷумҳуриявӣ 154 медал ба даст оварданд.
Бино ба иттилои Шаҳзод Раҳимов, сардори Раёсати ҷавонон, варзиш ва сайёҳии вилояти Хатлон, варзишгарони вилоят дар се моҳи аввали соли 2016-ум дар 3 мусобиқаи байналмилалӣ ширкат варзида, 11 медали тилло, 5 медали нуқра ва 4 медали биринҷиро сазовор гаштаанд.
Инчунин варзишгарони вилоят дар 14 мусобиқаи ҷумҳуриявӣ дар ҳайати дастаҳои «Хатлон-1» ва «Хатлон-2» иштирок намуда, 35 медали тилло, 33 медали нуқра ва 66 медали биринҷӣ ба даст оварданд.
Айни замон дар вилоят 29 мактаби варзишии кӯдакон ва наврасон, як мактаби махсуси олии варзишӣ фаъолият намуда истодааст, ки дар онҳо 12 ҳазору 890 нафар варзишгарон ба машқу тамрин машғул буда, аз он 1 ҳазору 600 нафарашро бонувон ташкил медиҳад.