Футзал: Бозиҳои Ҷоми Тоҷикистон

Душанбе, 7.04.2016 /АМИТ «Ховар»/. Дар Маҷмааи варзишии Агентии “Тоҷикгосстандарт” мусобиқаи гурӯҳии футболбозон оид ба футзал барои Ҷоми Тоҷикистон ба анҷом расид. Дар натиҷа беҳтарин дастаҳо ба бозиҳои нимниҳоӣ роҳхат гирифтанд.
Дар гурӯҳи “А” ғайричашмдошт дастаи “Сипар”-и Хуҷанд бар ҳарифони номдори худ “Бонки миллӣ”(9:4) ва “Эсхата”-и Кӯлоб(10:3) ғалаба карда, бо ду карат дорандаи унвони чемпионии футзали Тоҷикистон “Диси Инвест” бозиро мусовӣ (5:5) ба анҷом расонд.
Дар натиҷа аз гурӯҳи “А” “Сипар” бо 7 ва “Диси Инвест” бо 5 имтиёз ба рақобатҳои нимниҳоӣ роҳхат гирифтанд.
Дар гурӯҳи “Б” барандаи медалҳои нуқраи Чемпионати Тоҷикистон оид ба футзал “Соро Компания” бар ҳамаи ҳарифонаш бо натиҷаҳои калон ба пирӯзӣ расид. Дастаҳои “Чортан”(6:1), “Самандар”(12:6) ва “Диси Инвест- 2”(10:4) натавонистанд ба “Соро Компания” муқобилияти арзанда нишон диҳанд.
Ба ҳамин тариқ дар бозиҳои нимниҳоӣ пагоҳ “Сипар” бо “Чортан” ва “Соро Компания” бо “Диси Инвест” қувва меозмоянд.