Кӯлоб: Талошҳо барои пешгирии бекоршавии ақди никоҳ

Кӯлоб, 13.04.2016 /АМИТ «Ховар»/. Масъулини бахши Сабти асноди ҳолати шаҳрвандии Вазорати адляи ҶТ дар шаҳри Кӯлоб дар ҷамоатҳои шаҳрак ва деҳот вохӯриҳо доир намуда, роҷеъ ба ҷараёни амалишавии қонунҳои Ҷумҳурии Тоҷикистон «Дар бораи бақайдгирии давлатии асноди ҳолати шаҳрвандӣ», «Дар бораи масъулияти падару модар дар таълиму тарбияи фарзанд», « Дар бораи танзими анъана ва ҷашну маросимҳои миллӣ», Кодекси оила ва дигар масъалаҳое, ки ба пешравии ҷомеа вобастагӣ доранд, вохӯриҳо доир намуданд.
Ба иттилои мудири бахши Сабти асноди ҳолати шаҳрвандӣ дар шаҳри Кӯлоб Мумина Иброҳимзода, ба вохӯриҳо бештар ҷавонон ҷалб гардида, дар онҳо масъалаҳои пешгирии бекоршавии ақди никоҳ, дуруст ба роҳ мондани оиладорӣ, ҳидоят намудани кӯдакон ва наврасон ба ватандӯстию меҳанпарастӣ, пешгирии ҷавонон аз шомилшавӣ ба ҳар гуна ҳизбу ҳаракатҳои номатлуб, аз ҷумла гурӯҳҳои террористию экстремистӣ ва дигар мавзӯъҳои мубрами рӯз мавриди баррасӣ қарор гирифтанд.
Зимни мулоқотҳо иброз дошта шуд, ки дар давоми 3 моҳи соли равон 43 ақди никоҳ ва 14 ҳолати бекоршавии он ба қайд гирифта шудааст.