Кормандони АНМН тарзи ҳаёти солимро тарғиб менамоянд

Душанбе, 15.04.2016 /АМИТ «Ховар»/. Кормандони Агентии назорати маводи нашъаовари назди Президенти ҶТ дар чорчӯбаи «Ҳафтаи тарғиби тарзи ҳаёти солим», ки дар Донишгоҳи (славянии) Русияву Тоҷикистон эълон гардидааст, дар байни донишҷӯёни факултаи филология вохӯрӣ барпо намуда, бо онҳо суҳбати озоду ошкоро намуданд. Намояндагони Агентӣ оид ба натиҷаҳои иҷрои бандҳои «Стратегияи миллии мубориза бар зидди гардиши ғайриқонунии маводи мухаддир дар Ҷумҳурии Тоҷикистон барои солҳои 2013-2020» иттилоъ доданд ва донишҷӯёнро аз оқибатҳои нохуши даст задан ба маводи нашъаовар ҳушдор дода, таъкид намуданд, ки ҷавонон бояд дар ҳар як амали худ зираку дурандеш бошанд, то ба доми гурӯҳҳои тундрав наафтанд.
Ба андешаи иштирокдорон гузаронидани ин гуна тадбирҳои фаҳмондадиҳӣ байни ҷавонон аз шумораи муҳимтарин чораҳои пешгирикунанда мебошад, ки ҳоло дар муассисаҳои миёна ва олӣ амалӣ гардида истодааст.
Ба донишҷӯён видеофилмҳо дар бораи оқибатҳои фоҷиабори истеъмоли ғайритиббии воситаҳои нашъадор, маводи психотропӣ ва хусусан маводи нашъаовари синтетикӣ намоиш дода шуданд.