Неруҳои амниятии Алҷазоир гурӯҳи хурди террористиро ошкор намуданд

Душанбе, 4.04.2016 /АМИТ «Ховар»/. Хадамоти амнияти Алҷазоир дар минтақаи Эл-Уэд, ки 600 км аз пойтахти Алҷазоир дар наздикии сарҳад бо Тунис қарор дорад, шабакаеро оид ба дастгирии террористон кашф кард. Дар ин бора шабакаи радиоии «Mosaïque FM»-и Тунис хабар медиҳад.

«Дар ҷараёни амалиёти махсус дар минтақаи Эл-Уэд камаш 3 ҷангӣ, ки дастгирии гурӯҳҳои террористиро дар минтақа роҳбарӣ мекарданд, маҳв карда шуданд. Ғайр аз ин, неруҳои артиши миллии Алҷазоир паноҳгоҳеро, ки ҷинояткорон паноҳ мебурданд, нобуд карданд»,-иқтибос овардааст шабакаи радиоӣ аз изҳороти вазири мудофиаи миллии Алҷазоир.

Бино ба маълумоти вазорати мудофиаи Алҷазоир, соли 2015 артиши ин кишвар 157 террорист, аз ҷумла 10 роҳбари террористонро маҳв кардааст.