Пешгирии ҷавонон аз шомилшавӣ ба ҳизбу ҳаракатҳои террористӣ вусъат меёбад

Душанбе, 15.04.2016 /АМИТ «Ховар»/. Имрӯз дар Маркази тадқиқоти стратегӣ бо ибтикори Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон мизи мудаввар таҳти унвони «Роҳу усулҳои пурзӯр намудани корҳои фаҳмондадиҳӣ вобаста ба пешгирии шомилгардии ҷавонон ба ташкилотҳои байналмилалии террористию экстремистӣ ва иштироки ғайриқонунии онҳо дар муқовиматҳои мусаллаҳонаи хориҷи кишвар» доир гардид.
Дар мизи мудаввар намояндагон аз Прокуратураи генералӣ, Вазорати корҳои дохилӣ, Вазорати меҳнат, муҳоҷират ва шуғли аҳолӣ, Вазорати маориф ва илм, Кумитаи оид ба корҳои дин, танзими анъана ва ҷашну маросимҳои миллӣ, Маркази миллии қонунгузорӣ иштирок ва суханронӣ намуданд.
Зимни баргузории чорабинӣ гуфта шуд, ки мақсад аз роҳандозии чунин чорабинӣ, пеш аз ҳама, пешгирии ҷавонон аз шомилшавӣ ба ҳар гуна ҳизбу ҳаракатҳои террористию экстремистӣ ва беҳтар ба роҳ мондани корҳои фаҳмондадиҳӣ мебошад.