Сафири Тоҷикистон ба Президенти Шӯрои Иттиҳоди Аврупо эътимоднома супорид

Душанбе, 16.04.2016 /АМИТ «Ховар»/. Сафири Фавқулодда ва Мухтор, Намояндаи доимии Ҷумҳурии Тоҷикистон дар назди Иттиҳоди Аврупо Эркинхон Раҳматуллозода 15 апрел  эътимодномаи худро ба Президенти Шӯрои Иттиҳоди Аврупо Доналд Туск супорид.

Доналд Туск мулоқоти ахири худ бо Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро дар шаҳри Брюссел бо қаноатмандӣ ёдовар шуда, Сафирро ба муносибати ба ин вазифаи пурмасъул таъйин шудан табрику таҳният намуд ва ба ӯ зимни иҷрои рисолати дипломатӣ комёбиҳо таманно кард.

Дар рафти мулоқот тарафҳо ба сатҳи имрӯзаи муносибатҳои дуҷониба ва бисёрҷониба миёни Тоҷикистон ва Иттиҳоди Аврупо баҳои баланд дода, зикр намуданд, ки минбаъд низ барои таҳкими робитаҳои гуногунҷабҳа иқдом хоҳанд кард. Ҳамкории муассири тарафайн дар масоили таъмини амният, мубориза бар зидди хатару таҳдидҳои муосир дар сархати ин ҳамкориҳо қарор хоҳад дошт.

Сафири навтаъйини Тоҷикистон аз нақши мусбати барномаҳои дар Тоҷикистон татбиқшавандаи Иттиҳоди Аврупо, чун БОМКА, КАДАП ва Барномаи индикативии бисёрсола ёдовар шуда, нисбат ба кӯмаки Бонки сармоягузории Аврупо, ки аз ниҳодҳои зертобеи Иттиҳод аст, ҷиҳати татбиқи пружаи муҳимтарини минтақавӣ CASA-1000 ибрози сипос намуд. Таъкид гардид, ки тавсеаи татбиқи чунин барномаҳои мутақобилан муфид ба нафъи сулҳу субот ва рушди устувор дар кулли минтақа низ хоҳад буд.

Дар охир, Эркинхон Раҳматуллозода таъкид намуд, ки мубодилаи сафарҳои расмӣ байни роҳбарони Иттиҳоди Аврупо ва Ҷумҳурии Тоҷикистон ҷиҳати тавсеаи ҳамкориҳои мутақобилан судманди тарафҳо уфуқҳои тозаеро боз хоҳанд кард.