Шарҳи хавфҳои коррупсия ва муқовимат бо он

Душанбе, 21.04.2016 /АМИТ «Ховар»/. 20 апрел дар Донишкадаи молия ва иқтисоди Тоҷикистон (ДМИТ) бо иштироки намояндагони Агентии назорати давлатии молиявӣ ва мубориза бо коррупсияи Ҷумҳурии Тоҷикистон вохӯрӣ баргузор шуд.
Тавре аз донишкадаи мазкур хабар доданд, ин навбат вохӯрии кормандони агентӣ бо омӯзгорону кормандон ва донишҷӯёни ДМИТ дар асоси «Стратегияи муқовимат бо коррупсия дар Ҷумҳурии Тоҷикистон барои солҳои 2013-2020» доир шуда, дар он таҳлили хавфҳои коррупсия, дарки оқибатҳои ногувори он, роҳ надодан ва муқовимати омилҳои коррупсионӣ, масъалаҳои қонунгузории зиддикоррупсионӣ ва дар амал татбиқ намудани он шарҳу эзоҳ дода шуд.
Ректори донишкада Ашурбой Солеҳзода коррупсияро яке аз хатарҳои асосии ҷомеа номид ва афзуд, ки он ба рушди устувори давлат монеа эҷод мекунад. Паст намудани шиддати омилҳои коррупсионӣ иштироки фаъоли ҷомеаи шаҳрвандиро дар ин самт тақозо менамояд. Дар ДМИТ низ мутобиқи нақшаи чорабиниҳо оид ба муқовимат бо коррупсия корҳои фаҳмондадиҳии зиёд амалӣ карда мешаванд.
Сардори Сарраёсати пешгирии коррупсионии Агентии назорати давлатии молиявӣ ва мубориза бо коррупсияи Ҷумҳурии Тоҷикистон Нигора Муқимӣ доир ба бандҳои алоҳидаи «Стратегияи муқовимат бо коррупсия дар Ҷумҳурии Тоҷикистон барои солҳои 2013-2020» ва татбиқи он бо овардани мисолҳои мушаххас маълумот дод.
Мақсади баргузории вохӯрӣ фароҳам овардани фазои зиддикоррупсионӣ дар ҷомеа, шарҳи мақсади барномаҳои давлатии зиддикоррупсионӣ ва роҳҳои муқовимат бо коррупсия арзёбӣ гардид.