Собиқ декани ДМТ раиси Кумитаи Парлумон интихоб гардид

Душанбе,15.04.2016/АМИТ Ховар/. Эмомалӣ Насриддинзода-собиқ декани факултаи ҳуқуқшиносии Донишгоҳи миллии Тоҷикистон раиси Кумитаи Маҷлиси намояндагон оид ба қонунгузорӣ ва ҳуқуқи инсон интихоб гардид. Бояд зикр кард, ки Э. Насриддинзода аз Ҳизби Халқӣ-Демократии Тоҷикистон дар интихоботи миёнадаврӣ, ки 10 апрели соли равон дар ҳавзаи якмандатаи интихоботии Фирдавсӣ №1 доир гардид, бо гирифтани беш аз 80 % овозҳо вакили Маҷлиси намояндагони Маҷлиси Олии Ҷумҳурии Тоҷикистон интихоб шуд. Насриддинзода доктори илмҳои ҳуқуқшиносӣ буда, аз соли 2011 то 2016 ба ҳайси декани факултаи ҳуқуқшиносии ДМТ фаъолият дошт.
Инчунин дар ҷаласаи навбатии иҷлосияи дуюми Маҷлиси намояндагон Баҳодур Акрамзода узви Кумитаи Маҷлиси намояндагон оид ба иқтисод ва молия интихоб гардид. Мавсуф дар интихоботи миёнадаврӣ аз ҳавзаи интихоботии Ҷаббор Расулов №16 бо соҳиб шудан ба зиёда аз 50 % раъйи интихобкунандагон вакили палатаи поёнии Парлумони Тоҷикистон интихоб гардид. Маҷлиси намояндагони Маҷлиси Олии Ҷумҳурии Тоҷикистон 63 вакил дошта, ба муддати 5 сол интихоб карда мешаванд.