«Созандагони Ватан»: мубориза бар зидди терроризму экстремизм- рисолати ҳамаи мост

Душанбе, 21.04.2016. /АМИТ «Ховар»/. ТҶҶ “Созандагони Ватан” дар шаҳри Гулистон дар мавзӯи “Мубориза бар зидди терроризму экстремизм- рисолати ҳамаи мост” ҳамоиш доир намуд. Иштирокдорони ҳамоиш зикр карданд, ки давоми соли 2015 ва тайи се моҳи соли равон дар вилоят 559 нафар бо иттиҳоми терроризм ва экстремизм дастгир шуданд. Гаравидани ҷавонон ба гурӯҳҳои иртиҷоӣ ва равияҳои тундгаро муаммои ҷомеаи ҷаҳонӣ буда, пешгирӣ ва мубориза ба ин зуҳуроти номатлуб ҳамдастии кулли ҷомеаро тақозо дорад. Дар ин росто бо иқдоми Кумитаи иҷроияи вилоятии ҲХДТ дар вилояти Суғд даҳаи мубориза таҳти унвони “Интихоби ҷавонон: ҳаёт бидуни терроризм ва экстремизм” эълон гардидааст.
Бинобар ин дар асоси дастур ва ҳидояти Раиси ҲХДТ, Пешвои миллат Эмомалӣ Раҳмон роҳҳои мубориза бо терроризм ва экстремизм пурзӯр гардида, дар ин самт тадбирҳои мушаххас роҳандозӣ шудаанд. ТҶҶ “Созандагони Ватан” нисбат ба ин падидаи нанговар бе таваҷҷуҳ набуда, силсилаи чорабиниҳои тарғиботиву ташвиқотиро дар даҳрӯзаи мубориза бар зидди терроризму экстремизм дар ҳамкорӣ бо ташкилотҳои ибтидоии корхонаҳову муассисаҳо ҷонибдорӣ ва роҳандозӣ хоҳанд кард.