Дар Деваштич бахшида ба Рӯзи кӯдакон ва ҷашни Истиқлолият маҳфили идона доир гардид

Деваштич, 30.05.2016 /АМИТ «Ховар»/. Бахшида ба 25-умин солгарди Истиқлолияти Ҷумҳурии Тоҷикистон ва Рӯзи байналмилалии ҳифзи кӯдакон аз ҷониби ТҶҶ «Созандагони Ватан»-и ноҳияи Деваштич дар муассисаи томактабии №4-и деҳаи Хуштоири Мухлони Ҷамоати деҳоти Яхтани ноҳияи Деваштич маҳфили идона баргузор шуд.
Кӯдакон бо лаҳни ширини худ шеъру таронаҳоро дар васфи Ватан, Тоҷикистон, Пешвои миллат ва Истиқлолият суруда, саҳначаҳои ҷолиби диққатро дар мавзӯъҳои «Дифои Ватан» ва «Фарди солим» намоиш доданд. Ҳар як ҷумлаву мисраи гуфта ва ҳар як назару табассумашон аз зодагони даврони хушиқболӣ дарак медод ва он инчунин нишонаи таълиму тарбияи солиму ватанпарастона дар муассиса буда, гувоҳи пиёдасозии сиёсати хирадмандонаю маорифпарварона ва ғамхоронаи Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мебошад.
Ба тарбиятгирандагони кӯдакистони мазкур туҳфаҳои Кумитаи иҷроияи  ҲХДТ дар ноҳия тақдим карда шуданд.