Кӯдакону наврасони маъюб доим таҳти назоратанд

Душанбе, 17.05.2016. /АМИТ «Ховар»/. Конфронси байналмилалии дурӯзае, ки аз ҷониби Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар якҷоягӣ бо дафтари Ташкилоти умумиҷаҳонии тандурустӣ дар Тоҷикистон оғоз гардид, ба масъалаи бақайдгирии дуруст ва мушкилот дар самти шахсони имконияташон маҳдуд бахшида шудааст. Дастгирии шахсони дорои имкониятҳои маҳдуд аз самтҳои афзалиятноки Ҳукумати Ҷумҳурии Тоҷикистон ба ҳисоб меравад ва барои дастгирии ҳамешагии онҳо тамоми тадбирҳо андешида мешаванд.
Дар чорабинӣ роҳбарони муассисаҳои кумаки аввалияи тиббию санитарии кишвар, муассисаҳои тавонбахшии маъюбон, муассисаҳои махсусгардонидашудаи соҳа ва намояндагони вазорати беҳдошти ҷумҳуриҳои Молдова, Словения, Украина ва Туркманистон ширкат варзида, тӯли ду рӯз мушкилоти бақайдгирии маъюбон ва роҳҳои нави дарёфту табобати онҳоро баррасӣ хоҳанд кард. Зимни суханронии худ дар мавриди вазъи кунунии маъюбон, сардори раёсати хизматрасониҳои тиббӣ ба модарону кӯдакон ва танзими оилаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Шералӣ Раҳматуллоев зикр намуд, ки то 1 январи соли 2015 дар ҷумҳурӣ 153 ҳазору 248 маъюб ба қайд гирифта шудаанд, ки 25 ҳазори онҳоро кӯдакону наврасон ташкил медиҳанд. «Солимгардонии кӯдакону наврасон вазифаи аввалиндараҷаи мо буда, бо ин мақсад 8 мутахассиси ҷавон ба Ҷумҳурии Мардумии Чин барои омӯзиш ва такмили ихтисос дар курсҳои семоҳа ва шашмоҳа фиристода шуданд. Имрӯз ин мутахассисон бомуваффақият амалиёти ҷарроҳиро дар дили кӯдакон идома дода истодаанд. Ҳамчунин ба 250 нафар кӯдакону наврасони гирифтори ноқисиҳои узвҳои ҳаракату такягоҳ ҷарроҳӣ гузаронида шуд. Дар ҳамкорӣ бо мутахассисони Олмон ҳамасола дар кишвар ҷарроҳиҳои тармимии лаби боло ва кому ҷоғар амалӣ карда мешаванд,-илова намуд Шералӣ Раҳматуллоев.
Давраҳои омӯзишӣ ва такмили ихтисосро гурӯҳи калони мутахассисони тоҷик ҳамчунин дар кишвари Ҳиндустон гузаштанд. Ҳамасола дар муассисаҳои тавонбахшии ҷумҳурӣ беш аз 3000 кӯдакону наврасон саломатии худро барқарор мекунанд. Дар 9 маркази тиббию машваратӣ ва 2 маркази дахолати саривақтӣ, 21 ҳуҷраи машваратӣ малакаву нигоҳубини дурусти тифлакони маъюб ба волидони онҳо омӯзонида шуда, ба ин восита ба хонаҳои кӯдакон додани тифлакони маъюб пешгирӣ карда мешавад.
Роҳбари Ташкилоти умумиҷаҳонии тандурустӣ дар Тоҷикистон Игор Поканевич зикр кард, ки имрӯз бо вуҷуди хуб ба роҳ мондани дастгирии кӯдакону наврасони маъюб, онҳо мекӯшанд, ки дарёфти саривақтии бемориҳоро низ хуб ба роҳ монанд.
«Сари вақт ба қайд гирифтани кӯдакони дорои имконияти маҳдуд ҳам барои барвақт барқарор сохтани саломатӣ, ҳам барои зудтар ба модарон омӯзонидани малакаи нигоҳубини онҳо ва доштани маълумоти дақиқ мусоидат мекунад»,-зикр намуд Игор Поканевич.