Мусобиқаи шиноварӣ

Душанбе, 20.05.2016 /АМИТ «Ховар»/. Дар доираи чорабиниҳои «20 рӯзи ҷавонӣ» ва таҷлили Рӯзи ҷавонони Тоҷикистон дар шаҳри Хуҷанд таҳти унвони «Ҷавонон — пайрави Пешвои миллат ва муҳофизони дастовардҳои 25 соли Истиқлолияти давлатии Ҷумҳурии Тоҷикистон!» 19 майи соли 2016 дар Маҷмааи ҳавзҳои шиноварии ба номи  20-солагии Истиқлолияти Тоҷикистон мусобиқаи кушод оид ба шиноварӣ байни ҷавонон ва наврасон баргузор гардид, ки дар он 68 нафар варзишгарон иштирок намуданд.
Мусобиқаи мазкур аз рӯи 4 намуд- усулҳои тарзи озод, брасс, тахтапушт ва эстафета дар масофаи 50 метр гузаронида шуд.
Ғолибони мусобиқа бо диплом, медал ва туҳфаҳо сарфароз гардонида шуданд.
«Мақсади мусобиқа-ҷалби ҷавонону наврасон ба ин намуди варзиш, тарзи ҳаёти солим ва муайян намудани дастаи мунтахаби шаҳри Хуҷанд оид ба шиноварӣ барои иштирок дар мусобиқаҳои вилоятиву ҷумҳуриявӣ мебошад», — иброз дошт Бахтёр Исматҷонов, мудири бахши ҷавонон, варзиш ва сайёҳии шаҳри Хуҷанд.