Сафари гурӯҳи кории Кумитаи рушди маҳал ба Бадахшон

Душанбе, 02.05.2016 /АМИТ «Ховар»/. Раиси Кумитаи рушди маҳали назди Президенти Ҷумҳури Тоҷикистон дар якҷоягӣ бо Гурӯҳи корӣ барои таъмини иҷрои нақшаи чорабиниҳо оид ба ташкил ва баргузории тантанаҳои ҷуҳуриявии ҷашни Рӯзи Ваҳдати миллӣ дар Вилояти Мухтори Кӯҳистони Бадахшон ба ВМБК сафари корӣ анҷом дод.
Бояд ёдовар шуд, ки аз 27 то 30 апрели соли 2016 рӯзҳои фарҳангии вилояти Суғд дар Вилояти Мухтори Кӯҳистони Бадахшони ноҳияҳои Дарвоз, Рӯшон, Шуғнон ва шаҳри Хоруғ баргузор гардид.
Чорабинии мазкур 27 апрел дар ноҳияи Дарвоз, 28 апрел дар ноҳияи Рӯшон, 29 апрел дар ноҳияи Шуғнон ва 30 апрели соли равон дар шаҳри Хоруғ баргузор шуданд.
Ҳамзамон дар заминаи иҷрои Амри Президенти Ҷумҳурии Тоҷикистон, ки аз 24 феврали соли 2016 бахшида ба ҷашни 25 солагии Истиқлолияти давлатии Ҷумҳурии Тоҷикистон ба тасвиб расидааст, гурӯҳи кории Кумита бо мақсади мусоидат намудан ба раисони комиссияҳои дахлдор ва гурӯҳҳои ташаббускори вилояти Хатлон ҷиҳати дар марҳилаҳои мусобиқаи ҷумҳуриявӣ муайян намудани хона ва оилаи намунавӣ дар ҷамоати шаҳраку деҳот, деҳа ва маҳалла бо пешниҳоди тавсияҳо дар ҷамъоварии маводҳо, тартиб додани саволномаҳо, баррасии нишондиҳандаҳо ва гузаронидани ҷаласаҳо сафари корӣ анҷом дод.
Ҳадафи чорабиниҳо баланд бардоштани ҳисси хештаншиносӣ, ватандӯстӣ, ободкорӣ, зебоипарастӣ, эҳтиром ба арзишҳои миллӣ, фарҳанг, илму маориф, тандурустӣ, муҳити зист ва ифтихор аз анъанаҳои миллӣ мебошад.