“Севиля” ва сеюмин иштироки пай дар пай дар финали Лигаи Аврупо

Душанбе, 6.05.2016 /АМИТ «Ховар»/. Клуби футболи “Севиля”-и Испания маротибаи сеюм ба бозии ниҳоии Лигаи Аврупо пай дар пай роҳхат гирифт. Дар рақобат бо дастаи “Шахтёр”-и Украина футболбозони ин даста бо натиҷаи 3 бар 1 ғалаба карданд. Тӯбҳоро Кевин Гамейро(9, 47) ва Мариано(59) аз “Севиля” ва Эдуардо(44) аз “Шахтёр” ба ҳадаф расониданд.

Бозии аввали ин дастаҳо бо натиҷаи 2 бар 2 хотима ёфта буд.

Дар бозии баргашти ҷуфти дуюми  нимниҳоӣ”Ливерпул”-и Англия “Виляреал”-и Испанияро бо ҳисоби 3 бар 0 шикаст дод. Дар варзишгоҳи “Энфилд Роуд” Даниэл Стариҷ(63), Адам Лалана( 81) ва Бруно Сорино(7 -автогол) голҳоро муаллифӣ карданд.

Бозии аввал бо пирӯзии “Виляреал” бо нишондоди 1:0 ба поён расида буд.

Ҳамин тавр, “Севиля” дар ду соли охир ду маротиба соҳиби Ҷоми лигаи Аврупо гардидааст, “Ливерпул  ҳанӯз соли 2001 ин ҷомро сазовор шуда буд.