«Суҳбати ҳамсол»- вохӯрӣ бо донишҷӯдухтарон дар ДДТТ

Душанбе, 13.05.2016 /АМИТ «Ховар»/. 10-11 майи соли равон аз ҷониби аъзои фаъоли гурӯҳи ҷавонони «Пешоҳанг» бо истиқоматкунандагон донишҷӯдухтароне, ки аз тариқи квотаи президентӣ таҳсил мекунанд, дар хобгоҳҳои рақамҳои 2 ва 3-и Донишгоҳи давлатии тиббии Тоҷикистон ба номи Абуалӣ ибни Сино зери унвони «Суҳбати ҳамсол» бо иштироки беш аз 140 нафар духтарон суҳбати озоду самимӣ баргузор шуд.
Дар вохӯрӣ масъалаҳои ҳифз кардани Ваҳдати миллӣ, сулҳу осоиштагӣ, зери назари ҳамешагӣ қарор додани ҳаёти сиёсии ҷаҳони муосир, раъйпурсии умумихалқӣ оид ба ворид намудани тағйиру иловаҳо ба Конститутсияи Ҷумҳурии Тоҷикистон ва эмин мондан аз хатару таҳдидҳои равандҳои тундгароию ифротгароӣ мавриди баррасӣ қарор гирифтанд.
Аз ҷониби аъзои фаъоли «Пешоҳанг» зикр гардид, ки донишҷӯдухтарон дар ободонӣ ва шукуфоии Ватани азизамон саҳми арзандаи хешро мегузоранд.