Теъдоди муҳоҷирони меҳнатӣ ба хориҷи кишвар 10 фоиз кам шуд

Душанбе, 17.05.2016. /АМИТ «Ховар»/. Дар чор моҳи соли равон ба муҳоҷирати меҳнатӣ 209 ҳазору 788 шаҳрвандони ҷумҳурӣ сафар карданд, ки аз он 26 ҳазору 793 нафараш занон мебошанд. Ин нишондиҳанда нисбат ба ҳамин давраи соли гузашта 10 фоиз кам мебошад.
Бино ба маълумоти сармутахассиси Шуъбаи таҳлил ва маълумотдиҳии Хадамоти муҳоҷират Рухшона Ёрмамадова, аз ин теъдод чор ҳазору 127 нафар ба шаҳрҳои Қазоқистон сафар намуданд, ки 1 ҳазору 527 нафарашон занон буданд .
«Дар айни замон ба Тоҷикистон 85 ҳазору 702 шаҳрванди мамлакат, яъне муҳоҷирони меҳнатӣ баргаштанд, ки аз онҳо 9 ҳазору 544 нафарашон занҳо мебошанд»,-илова намуд Рухшона Ёрмамадова
Бояд гуфт, ки баҳисобгирии рафти шаҳрвандон ба хориҷа ва бозгашт аз хориҷа, дар асоси қарори Ҳукумати Ҷумҳурии Тоҷикистон аз 1 августи соли 2008 амалӣ карда мешавад. Дар чор моҳи соли равон аз қаламрави ҷумҳурӣ ба хориҷи кишвар 238 ҳазору 985 нафар сафар намуданд, ки зиёда аз 34 ҳазори онро занон ташкил медиҳад. Аз ин ҳисоб, барои корҳои шахсӣ — 12 ҳазору 349 нафар, тиҷорат — зиёда аз 11 ҳазор нафар, саёҳат — 4126 нафар, сафари хизматӣ — 624 нафар ва таҳсил 1086 нафар сафар намуданд.