БМТ маърифати молиявии аҳолиро баланд мебардорад

Душанбе, 13.06.2016 /АМИТ «Ховар»/.    Бо мақсади баланд бардоштани маърифати молиявии аҳолӣ ва пешбурди фаъолияти самаранок дар бахши низоми бонкии кишвар Бонки миллии Тоҷикистон (БМТ) дар ҳамбастагӣ бо Гурӯҳи Бонки ҷаҳонӣ барои кормандони бахши ҳимояи ҳуқуқи истеъмолкунандагони Бонки миллии Тоҷикистон ва шуъбаҳои минтақавии он дар мавзӯи «Ҳимояи ҳуқуқи истеъмолкунандагон ва баланд бардоштани маърифати молиявӣ» семинари омӯзишӣ баргузор намуд.
Тавре ки аз хадамоти матбуоти БМТ хабар доданд, ҳадафи чорабинии мазкур такмил додани дониши молиявии кормандони ин бахши бонкӣ буда, ба иштирокдорони семинар дар бораи нозукиҳои хизматрасонии низоми бонкӣ, дуруст истифода бурдани пешниҳодҳо ва дар сатҳи зарурӣ ба роҳ мондани ҳимояи ҳуқуқи истеъмолкунандагон дарсҳои таълимӣ гузаронида шуданд.
Дар робита ба баргузории семинари мазкур бояд зикр намуд, ки таъмини дастрасии аҳолӣ ба хизматрасониҳои низоми бонкӣ, рушди соҳибкории хурду миёна, баланд бардоштани сатҳи маърифатнокии молиявии мардум ва зиёд намудани боварии аҳолӣ ба низоми бонкӣ аз самти афзалиятноки Бонки миллии Тоҷикистон ба шумор меравад.