Дар қӯшунҳои сарҳадӣ Рӯзи Ваҳдати миллиро ҷашн гирифтанд

Душанбе, 28.06.2016. /АМИТ «Ховар»/. Ба муносибати 19-умин солгарди ба имзо расидани Созишномаи истиқрори сулҳ ва ризоияти миллӣ ва ҷашни Ваҳдати миллӣ дар дастгоҳи марказии қӯшунҳои сарҳадии КДАМ ҶТ бо иштироки роҳбарон, кормандон ва меҳмонон ҷамъомади тантанавӣ баргузор гардид.
Дар ҷамъомад муовини якуми Фармондеҳ, сардори сарситоди ҚС КДАМ ҶТ Изатулло Файзуллоев, директори энсиклопедияи Вазорати фарҳанги ҶТ Н.Қ. Амиршоев ва Ваколатдор оид ба ҳуқуқи инсон дар ҶТ Зариф Ализода дар бораи моҳияту аҳамияти ваҳдати миллӣ сухан ронда, зикр намуданд, ки Ваҳдати миллӣ ҳамчун омили муттаҳидсозандаи миллати тоҷик имкон фароҳам овард, ки бо истифодаи арзишҳои аз ҷониби ҷомеаи ҷаҳонӣ пазируфташуда дар кишварамон таҳкурсии ташаккули ҷомеаи шаҳрвандӣ гузошта шавад ва ба ин восита барои беҳтар гардидани сатҳу сифати зиндагии мардум, ободии Ватан ва ояндаи давлати соҳибистиқлоламон заминаи мусоид муҳайё гардид.