«Диққат!!! Дар ин мавзеъ оббозӣ манъ аст!»- ҳушдор ба наврасон

Душанбе, 16.06.2016 /АМИТ«Ховар»/. Аз тарафи Ситод оид ба ҳолатҳои фавқулода ва мудофиаи граждании шаҳри Қурғонтеппа дар як зумра муасиссаҳои таҳсилоти умумии шаҳр корҳои фаҳмондидадиҳӣ оид ба пешгирии ҷавонон ва наврасон аз ғарқшавӣ дар каналҳои атрофи шаҳр ҷамъомадҳо гузаронида мешаванд.
Дар ҷамъомадҳо оид ба қоидаҳои шиноварӣ ва оббозӣ, расонидани ёрии аввалини тиббӣ ҳангоми ғарқшавии одамон маълумоти муфассал дода мешавад.
Тавре сардори ситод оид ба ҳолатҳои фавқулода ва мудофиаи граждании шаҳри Қурғонтеппа Зоирҷон Фатҳуллоев иброз намуд, мақсади чунин иқдомҳо, пеш аз ҳама, пешгирии ҳодисаҳои нохуш дар ҷомеа ва дар мавзеъҳои хатарнок шиноварӣ ва оббозӣ накардани наврасону ҷавонон мебошад.
Номбурда ҳамчунин зикр кард, ки дар атрофи каналҳои «Ҷайҳун» «Бибихонум» ва «Гирди шаҳр» тоблуҳои «Диққат!!! дар ин мавзеъ оббозӣ манъ аст, ҳаёти худро зери хатар нагузоред» гузошта шудааст, вале аз бемасъулиятии баъзеҳо онҳо канда шудаанд.