Ду медали самбочиён дар Мусобиқаи байналмилалӣ дар шаҳри Маскав

Душанбе, 20.06.2016 /АМИТ «Ховар»/. Дар шаҳри Маскав мусобиқаи байналмилалӣ дар риштаи самбо доир гардид, ки дар он паҳлавонони тоҷик ширкат варзида, бо ду медали биринҷӣ ба Тоҷикистон баргаштанд. Дар мусобиқаи мазкур, ки аз 16 то 20-уми июн байни дастаҳои мунтахаби кишварҳои узви Созмони Паймони Аҳдномаи Дастаҷамъӣ (СПАД) гузаронида шуд, варзишгарон аз Тоҷикистон, Русия, Арманистон, Қирғизистон, Қазоқистон ва Беларус ширкат карданд.
Ба Хайрандеши Муродалӣ муяссар шуд, ки дар вазни 65 кг соҳиби медали биринҷӣ гардад. Баъди ғалаба ба паҳлавонони Арманистону Русия, Хайрандеш дар вохӯрии нимниҳоӣ аз варзишгари қирғиз мағлуб шуд.
Паҳлавони дигари мо Сомон Сангов дар вазни 48 кг натиҷаи ҳамдастаашро такрор карда, сазовори медали биринҷӣ гардид.
Ёдовар мешавем, ки дар ин мусобиқа 4 варзишгар аз Тоҷикистон ширкат карданд.