Кишоварзони Суғду Хатлон маҳсулоти худро ба сокинони Хоруғ бо нархи арзон пешниҳод карданд

Хоруғ, 21.06.2016 /АМИТ«Ховар»/. Бо супориши Асосгузори сулҳу Ваҳдати миллӣ ва Президенти кишвар, Агентии захираҳои моддии давлатии назди Ҳукумати Ҷумҳурии Тоҷикистон, Вазорати кишоварзӣ ва мақомоти ҳокимияти давлатии вилоятҳои Суғду Хатлон ва ноҳияҳои тобеи марказ вазифадор шуданд, ки дар арафаи ҷашни Ваҳдати миллӣ зиёда аз 200 тонна маҳсулоти кишоварзиро ба сокинони маркази ВМКБ дастрас намоянд. Ба мақсади бевосита расондани ин маҳсулот ба дасти сокинон қарор шуд, ки фурӯши онро дар бозорҳои маҳаллаҳои шаҳр ба роҳ гузоранд.
Муовини вазири кишоварзӣ Зеваршо Зеваршоев гуфт, ки аз ин рӯ  4 нуқтаи савдо дар маҳаллаҳои Тирчид, УПД, Хоруғи боло ва ба номи Шириншо Шоҳтемур ташкил намудем.  Нархи ҳамаи намудҳои маҳсулот нисбат ба нархи мағозаву бозорҳои шаҳр 50 фоиз арзон аст.
Ин ярмарка-фурӯши маҳсулоти кишоварзӣ то рӯзи 28 июн идома меёбад.