Мусобиқаи ҷумҳуриявии «Соли бунёди боғҳои фарҳангӣ- фароғатӣ» дар Хатлон

Душанбе, 07.06.2016 /АМИТ «Ховар»/. Ҷиҳати дар сатҳи баланд ҷашн гирифтани 25- солагии  Истиқлолияти давлатии Ҷумҳурии Тоҷикистон, фароҳам овардани шароити мусоид барои рушди иқтисодию иҷтимоии мамлакат, ободонӣ, бунёдкорӣ, ҳифзи анъанаҳои миллӣ ва фарҳангӣ шурӯъ аз 17- майи соли равон дар шаҳру ноҳияҳои Қурғонтеппа- Сарбанд, Бохтар, Вахш, Ҷ. Балхӣ, Дӯстӣ, Ҷайҳун, Панҷ, Шаҳритуз, Қубодиён ва Н. Хусрав мусобиқаи ҷумҳуриявии «Соли бунёди боғҳои фарҳангӣ -фароғатӣ» баргузор гардида, он дар шаҳру ноҳияҳои дигар идома дорад.
Мақсад аз баргузории мусобиқаи ҷумҳуриявии «Соли бунёди боғҳои фарҳангӣ -фароғатӣ» омӯзиш ва такмили фаъолияти боғҳои фарҳанг ва фароғат, баланд бардоштани нақши онҳо дар тарбияи маънавию ахлоқии шаҳрвандон, ба макони ҳақиқии истироҳати сокинони ҷумҳурӣ табдил додани боғҳо, рангин ва ғанӣ гардонидани фароғати мардум дар шароити нави иҷтимоии фарҳангӣ мебошад.
Боғҳои фарҳанг ва фароғатие, ки пас аз ҷамъбасти мусобиқа ба натиҷаҳои беҳтарин ноил мегарданд, аз ҷониби Вазорати фарҳанг бо ифтихорнома ва нишони сарисинагии «Аълочии фарҳанги Ҷумҳурии Тоҷикистон» сарфароз гардонида мешаванд.