Мусодираи наздики 8 кило маводи нашъадори афюн ва героин аз шаҳрвандон

Душанбе, 3.06.2016 /АМИТ «Ховар»/. 2 июн зимни гузаронидани чорабиниҳои фаврию ҷустуҷӯӣ аз ҷониби кормандони милитсия марди 50- солаи сокини шаҳри Истаравшан ҳамчун гумонбар дар муомилоти ғайриқонунии маводи нашъадор дастгир карда шуд.
Тавре ки аз Вазорати корҳои дохилии Ҷумҳурии Тоҷикистон хабар доданд, дар вақти кофтукови шахсӣ аз гумонбаршуда 1 бастаи полиэтиленӣ, ки дар дохили он маводи сахттаъсири героин бо  вазни 4 килою 904 грамм  дарёфт ва мусодира карда шуд.
Инчунин дар ин рӯз ҳангоми гузаронидани чорабиниҳои фаврию ҷустуҷӯӣ дар ҳудуди деҳаи Саркори шаҳри Турсунзода, кормандони ШВКД дар шаҳри мазкур ду марди 22 ва 24-солаи сокинони шаҳри Турсунзодаро бо гумони ғайриқонунӣ нигоҳ доштани маводи нашъадор дастгир намуданд.
Дар вақти кофтукови шахсӣ, аз дохили пакети полиэтиленӣ маводи нашъадори навъи афюн бо вазни 2 килою 870 грамм дарёфт ва мусодира карда шуд.
Нисбат ба далелҳои мазкур парвандаҳои ҷиноятӣ оғоз гардида, тафтишот идома дорад.