Аҳамияти робитаҳои фарҳангиву дӯстонаи Чин ва Тоҷикистон баррасӣ шуд

Душанбе, 07.07.2016. /АМИТ «Ховар»/. 5 июл вазири фарҳанги Ҷумҳурии Тоҷикистон Шамсиддин Орумбекзода бо намояндагони шуъбаи робитаҳои байналмиллалии Кумитаи Ҳизби Коммунистии Чин дар вилояти Гансуи Ҷумҳурии Мардумии Чин (ҶМЧ) вохӯрӣ намуд.
Зимни вохӯрӣ муовини нозири шуъбаи номбурда Хуан Хуймин дар бораи аҳамияти робитаҳои фарҳангиву дӯстонаи Чин ва Тоҷикистон зикр намуд, ки мақсад аз ташрифи онҳо ин даъват кардани Вазири фарҳанги Тоҷикистон бо ҳайъаташ ба Якумин намоишгоҳи байналмиллалии Экспо «Роҳи Абрешим» аст.
Меҳмонон инчунин зикр карданд, ки Ҷумҳурии Тоҷикистон яке аз панҷ кишвари асосии даъватшуда аст ва барои ҶМЧ муносибатҳои фарҳангӣ бо кишвари мо аҳамияти хосса дорад.
Тибқи изҳороти  Хуан Хуймин ба намоишгоҳ 72 давлат даъват шуда, аллакай 32 вазирони фарҳангҳои кишварҳои дигар иштироки худро тасдиқ кардаанд.
Шамсиддин Орумбекзода низ аҳамияти робитаҳои дуҷонибаро бо кишвари дӯсту ҳамсояи Чин барои Тоҷикистон зикр карда, иброз дошт, иштирок дар намоишгоҳи мазкур барои боз ҳам мустаҳкамтар кардани робитаҳои ду кишвари ҳамсоя мусоидат хоҳад кард.
Якумин намоишгоҳи байналмиллалии фарҳангии ЭКСПО «Роҳи Абрешим» 21-22 сентябр дар шаҳри Дунхуани ҶМЧ баргузор мегардад ва дар он вазири фарҳанг Шамсиддин Орумбекзода иштирок хоҳад кард.
Дар намоишгоҳи мазкур самтҳои афзалиятнок ва дурнамои рушди ҳамкориҳои фарҳангӣ, аз ҷумла масъалаҳои марбут ба Шоҳроҳи бузурги Абрешим дар минтақа баррасӣ мегарданд.