Алан Касаев: Тоҷикистон ватани дуввуми ман аст

Душанбе, 01.07.2016. /АМИТ «Ховар»/. Алан Касаев яке аз бозингарони шинохтаи КФ«Локомотив»-и Маскав, ки зодаи Тоҷикистон мебошад, бо ҳайати «Локомотив» барои вохӯрии дӯстона бо «Истиқлол»-и Душанбе ба пойтахти Тоҷикистон омада буд.
Алан 8 апрели соли 1986 дар шаҳри Турсунзода ба дунё омада, ҳамчун футболбоз дар бошишгоҳҳои   «Титан», «Шинник», «Зенит», «Алания», «Кубан», «Рубин», «Динамо»-и Маскав ва «Локомотив» ҳунарнамоӣ кардааст.  Соли 2008 дар ҳайати дастаи мунтахаби ҷавонони Русия ва соли 2011-2012  узви дастаи мунтахаби Русия-2 ба шумор мерафт.
Дар сӯҳбат Алан Касаев ба АМИТ «Ховар» гуфт: « Ватани дуввум будани Тоҷикистонро хуб эҳсос мекунам. Солҳои зиёд ба ин ҷо наомадаам. Аз меҳмоннавозии мардуми тоҷик бозингарону мураббиёни «Локомотив»  дар ҳайратанд.  Моро хеле олӣ пешвоз гирифтанд. Бисёр савол медиҳанд, ки ман дар ҳайати дастаи мунтахаби Тоҷикистон бозӣ карданӣ ҳастам ва ё не? Ба ин савол ҷавоб додан ниҳоят душвор аст. Ман таҳти назари роҳбарони  тими мунтахаби Русия қарор дорам ва масъалаҳое ҳастанд, ки аз ман бастагӣ надоранд. Мебинам, ки футбол дар ин ҷо хеле пешрафта аст».
Ёдрас мешавем, ки дар бозии дӯстона, ки дар варзишгоҳи марказии пойтахт баргузор гардид, дастаи «Локомотив» бо натиҷаи 2:1 дастаи «Истиқлол» -ро мағлуб кард.