Ҷаласаи Комиссияи доимоамалкунандаи буҷетӣ дар ҳузури Сарвазири мамлакат

Душанбе, 13.07.2016. /АМИТ «Ховар»/. Имрӯз таҳти раёсати Сарвазири мамлакат Қоҳир Расулзода ҷаласаи Комиссияи доимоамалкунандаи буҷетӣ доир гардид.
Дар ҷаласа масъалаи вобаста ба лоиҳаи Нишондиҳандаҳои макроиқтисодӣ, даромади Буҷети давлатии Ҷумҳурии Тоҷикистон ва ҳадди ниҳоии хароҷоти он аз рӯи соҳаҳо барои солҳои 2017-2019 мавриди баррасӣ қарор дода шуд.
Доир ба масъалаҳои асосии рӯзнома, аз ҷумла вазъи иқтисодӣ, иҷрои қисми даромади буҷети давлатӣ, манбаҳои асосии ҷамъоварии андоз ва имконияти воқеии пардохтпазирии субъектҳои андозсупоранда ва нақшаи дурнамои пардохтҳои гумрукӣ барои солҳои 2017-2019 роҳбарони аввали вазорату идораҳои бахши иқтисодии мамлакат баромад намуданд.
Дар ҷаласа лоиҳаи Нишондиҳандаҳои макроиқтисодӣ, даромади Буҷети давлатии Ҷумҳурии Тоҷикистон ва ҳадди ниҳоии хароҷоти он аз рӯи соҳаҳо барои солҳои 2017-2019 маъқул дониста шуда, роҳбарони вазорату идораҳои дахлдор муваззаф гардиданд, ки бо назардошти таклифу пешниҳодоти аъзои Комиссияи доимоамалкунандаи буҷетӣ лоиҳаи Қарори Ҳукумати Ҷумҳурии Тоҷикистонро аз нав такмил дода, барои баррасӣ пешниҳод намоянд.