Ҷамшед Нурмуҳаммадзода, раиси БМТ: «Қурби мубодилавии сомонӣ дар бозори асъор устувор гардид»

Душанбе, 25.07.2016. /АМИТ «Ховар/.  Қурби  расмии асъори миллӣ,  сомонӣ  нисбат ба доллари амрикоӣ аз аввали сол то  30 июни соли равон 10,7 % коҳиш ёфт, ки аз он 10,4 % ба моҳи январ ва 0, 3 % ба моҳи феврал рост омада, дар чор моҳи охир қурб тағйир наёфтааст.
Ҷамшед Нурмуҳаммадзода, раиси Бонки миллии Тоҷикистон имрӯз дар ҷамъи хабарнигорон гуфт, ки  қурби мубодилавии сомонӣ бо андешидани чораҳои  таъсиррасон барои таъмини вазъи  муътадили бозори  дохилии асъор  устувор гардид, ки  ин ба раванди муътадили тағйирёбии сатҳи  нархҳо заминаи мусоид гузошт.
Дар нишасти хабарӣ зикр шуд,  ки  дар ин давра, қурби доллари  нақдии амрикоӣ 4,1 % баланд шуда,  дар ҳоле ки дар ҳамин давраи  соли гузашта он беш аз 13% афзоиш дошт. Тафовути байни  қурби расмӣ  ва қурби доллари  нақдии амрикоӣ 17,5 %  то ба 0,3 % коҳиш ёфта, минбаъд  дар ҳудуди то ду фоиз  ба танзим  дароварда мешавад.
Ҳамзамон Ҷамшед Нурмуҳаммадзода таъкид кард, ки Бонки  миллии Тоҷикистон дар ин давра  бо мақсади коҳиш додани  таъсири манфии буҳрони молиявии ҷаҳонӣ, сиёсати  самарабахши   пулию  қарзӣ ва асъории  худро ҷиҳати таъмини  рушди муътадили ҳаҷми пул  дар иқтисодиёт, нигоҳдории сатҳи зарурии  нархҳо, суботи молиявӣ ва мусоидат  ба рушди устувори иқтисодиёт равона намуд.