Донишкадаи молия ва иқтисоди Тоҷикистон аз рӯи 37 ихтисос мутахассис тайёр мекунад

Душанбе, 26.07.2016. /АМИТ «Ховар»/. Дар Донишкадаи молия ва иқтисоди Тоҷикистон факултаҳои «Молия ва қарз, «Ҳисобдорӣ ва омор», «Иқтисоди молиявӣ ва андозбандӣ», «Муносибатҳои иқтисодии байналмилалӣ», «Менеҷмент  ва ҳуқуқи молиявӣ», «Технологияҳои иттилоотӣ дар иқтисодиёт» ва шуъбаи магистратура амал мекунанд, ки аз рӯи 37 ихтисос мутахассисонро тайёр менамояд. Ин матлабро дирӯз ректори донишкада Ашӯрбой Солеҳзода зимни нишасти матбуотӣ оид ба фаъолияти нимсолаи донишкада  иброз намуд.
Дар айни замон дар донишкада 1633 нафар донишҷӯён тариқи буҷавӣ, 75 нафар тибқи квотаи Президентӣ ва 4 ҳазору  807 нафар  тариқи шартномавӣ дар шуъбаи рӯзона ва ғоибона таҳсил мекунанд.
Бояд гуфт, ки Донишкадаи молия ва иқтисоди Тоҷикистон дар байни 31 донишгоҳу донишкадаҳо дар рейтинги муассисаҳои таҳсилоти олии касбӣ ҷойи чорумро ишғол намудааст, ки нуфузи донишкадаро дар байни муассисаҳои таҳсилоти олии касбӣ боз ҳам боло бардоштааст.