Ду нафар таблиғгарони «ҷамоати таблиғ» дар ноҳияи Мурғоб ҷазои сазовор гирифтанд

Хоруғ, 26.07.2016. /АМИТ «Ховар»/.  Ду нафар аз сокинони ноҳияи Мурғоб Кутман Мамбетқулов ва Бактияр Асанов баъди ду соли таҳсил дар яке аз мадрасаҳои мамолики хориҷӣ ба хона баргашта, ба ташвиқу тарғиби ғояҳои ифротиву экстремистии «ҷамоати таблиғ» пардохтанд.
Дар ҳоле ки ҳанӯз 10 сол қабл, яъне 30 марти соли 2006 фаъолияти ин гуна ташкилотҳои динӣ-экстремистӣ аз  ҷониби  Суди Олии ҶТ  манъ шудааст. Сарфи назар аз ин Кутман ва Бактияр, ки аз ғояҳои пок ва аслии дини мубини ислом заррае баҳра набурдаанд, мутобиқ ба фармудаҳои хоҷагони хориҷии худ бо мӯи сару риши дароз, шими кутоҳпоча ва чашмҳои сурмазада  гашта, байни мардум аз китобҳои «Алти-сифат», «Юсуф баянат», «Фазоил амал» иқтибосҳои подарҳаво оварда, дар миёнашон тафриқаву ихтилоф меандохтанд.
Аз ғояти ҷаҳолату таассуб номҳое, ки волидонашон ба онҳо ниҳода буданд, рӯ гардонида, Кутман номашро ба  «Абдулло » ва Бактияр ба «Абубакр»  иваз намуданд.  Баъди таҳлил ва пайгирии аъмолашон ин ду нафар аз тарафи кормандони раёсати КДАМ дар ВМКБ бо далелҳои шайъӣ боздошт шуда, нисбат ба онҳо парвандаи ҷиноӣ боз ва ба суди ноҳияи Мурғоб ирсол карда шуд. Суди ноҳия амалҳои ифротгароёна ва зидди конститутсионии онҳоро мавриди таҳқиқ қарор дода, мутобиқи моддаи 307  Кутман Мамбетқуловро ба муҳлати 6 сол ва Бактияр Асановро ба муҳлати 5 солу 6 моҳ аз озодӣ маҳрум сохт.