Ҷилавгирӣ аз қочоқи маснуоти заргарӣ дар «Гулистон»

Душанбе, 12.07.2016. /АМИТ «Ховар»/. Гумрукчиёни тоҷик дар шимоли кишвар аз қочоқи маснуоти заргарӣ ҷилавгирӣ намуданд.
Дар дидбонгоҳи гумрукии «Гулистон»,  воқеъ дар шаҳри Исфара воситаи нақлиёти тамғаи «Ауди 100», ки аз ҷониби шаҳрванди 67-сола   Т.М., сокини шаҳри Исфара идора мегардид, боздошт шуд.
Зимни муоинаи шахсӣ аз либоси дар тан доштаи мусофирони мошини мазкур шаҳрвандон  Б.М., соли таваллудаш 1956 ва А.И., соли таваллудаш 1961, ки сокинони шаҳри Истаравшананд, се халтача пайдо гардид, ки дар дохили онҳо маснуоти заргарии тамғаношуда ба  миқдори умумии 488 дона бо вазни беш аз 700 грамм мавҷуд буд, дарёфт ва гирифта шуд.
Тибқи хулосаи нозироти давлатии иёргарии назди Вазорати молияи кишвар, маснуоти заргарии аз шаҳрвандон гирифташуда, намуди тиллои иёри 375 буда, вазни умумии он 747,13  граммро ташкил дод.
Аз рӯи ин ҳолат нисбат ба ин шаҳрвандон бо моддаи 2591 қисми 1-и Кодекси ҷиноятии Ҷумҳурии Тоҷикистон парвандаҳои ҷиноӣ оғоз гардида, ба Прокуратураи шаҳри Исфара фиристода шудааст.