Неъматулло Эмомзода: «Миёни Тоҷикистон ва Эрон беш аз 160 санади ҳамкории дуҷониба ба имзо расидааст»

Июль 26, 2016 13:23

Душанбе, 26.07.2016. /АМИТ «Ховар»/. Дар Сафорати Ҷумҳурии Тоҷикистон дар Ҷумҳурии Исломии Эрон бо иштироки васеи рӯзноманигорони дохилӣ ва хориҷӣ, намояндагони вазорату идораҳои ҶИЭ ва ҳайати дипломатии муқими Эрон  дар робита ба  таҷлили ҷашни 25-умин солгарди Истиқлолияти давлатии Ҷумҳурии Тоҷикистон ва Ҳамоиши байналмилалии сатҳи баланд оид ба ҳадафи шашуми рушди устувор ва вазифаҳои вобаста ба он таҳти унвони «Таъмини дастрасии ҳамагонӣ ба об ва беҳдошт»,  ки баргузории он  9 -11 августи соли  2016 дар шаҳри Душанбе ба нақша гирифта шудааст, нишасти хабарӣ  баргузор гардид.
Сафири Тоҷикистон дар ҶИЭ Неъматулло Эмомзода оид ба дастовардҳои ҷумҳурӣ дар давраи истиқлолият сухан ронда, аз таҳкими сулҳу субот ва ваҳдати миллӣ, тақвияти ислоҳоти сиёсӣ, иқтисодӣ ва иҷтимоӣ, ташаккули сиёсати хориҷии кишвар ва  аҳамияти пеш гирифтани сиёсати «дарҳои боз», роҳандозӣ ва  таҳкиму густариши робитаҳои дӯстона ва ҳамкориҳои судманд бо кишварҳои гуногуни олам ёдовар шуд.
Неъматулло Эмомзода дар бораи равобити гуногунҷанба ва мутақобилан судманди ду кишвар сухан ронда, зикр намуд, ки миёни Ҷумҳурии Тоҷикистон ва Ҷумҳурии Исломии Эрон то ба имрӯз беш аз 160 санади ҳамкории дуҷониба ба имзо расидааст.
Сафир дар бораи масоили об ва мушкилоти вобаста ба он дар арсаи ҷаҳон ҳарф зада, зимнан аз ташаббусҳои Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тазаккур дод. Ҳамчунин оид ба Ҳамоиши байналмилалӣ таҳти унвони «Таъмини дастрасии ҳамагонӣ ба об ва беҳдошт» дар  Душанбе ва ҳадафҳои он барои баррасии масъалаҳои дарёфти роҳҳои иҷрои ҳадафи шашуми рушди устувор ва вазифаҳои вобаста ба он, сухан ронда изҳор намуд: «Имрӯз дар шароити таъсири афзояндаи равандҳои глобалӣ ба захираҳои об ва афзоиши якбораи истифодаи об, дарёфт ва ба таври доимӣ беҳтар намудани муколама ва шарикӣ оид ба масъалаҳои об, роҳандозии ҳамкории самарабахшу оқилона дар соҳаи об ба эҷоди рушди устувор, коҳиши камбизоатӣ, нигаҳдории тавозун ва устувории экологӣ ва  умуман, таъмини сулҳу амонӣ мусоидат хоҳад кард».

Июль 26, 2016 13:23

Хабарҳои дигари ин бахш

Дар ноҳияи Файзобод бо фаъолону собиқадорон ва ходимони дини деҳоти Чашмасор мулоқот доир гардид
Дар ду қисми низомии тобеи Вазорати корҳои дохилии Тоҷикистон дастархони идона ороста гардид
Дар ноҳияи Деваштич маъракаи кишти картошка оғоз шуд
Иҷлосияи нуздаҳуми Маҷлиси вакилони халқи вилояти Хатлон, даъвати шашум доир гардид
Дар пайравӣ ба амалҳои хайрхоҳонаи Президенти Тоҷикистон дар якчанд қисми ҳарбӣ дастурхони идона ороста шуд
Дар Неругоҳи барқи обии «Норак» ҷашни байналмилалии Наврӯз бо шаҳомати хосса таҷлил гардид
Имрӯз дар Тоҷикистон ҳаво тағйирёбанда шуда, борон ва раъду барқ пешгӯӣ мешавад
Наврӯз ҳамчун ҷашни эҳёи табиат истифодаи оқилонаи заминро талқин менамояд
Кишоварзони ноҳияи Зафаробод дар 120 гектар картошкаи барвақтӣ кишт менамоянд
Дар Агентии содироти Тоҷикистон бо намояндагони Агентии назорати давлатии молиявӣ ва мубориза бо коррупсия вохӯрӣ доир шуд
Ба кишоварзони ноҳияи Деваштич барои парвариши картошка ва тухмиҳои хушсифат тавсияҳо дода шуд
Дар ноҳияи Спитамени вилояти Суғд кишти чигит оғоз ёфт