Парвандаи ҷиноятӣ барои қочоқи дастгоҳҳои барқтаъминкунанда

Душанбе, 4.07.2016 /АМИТ «Ховар»/. 1 июли соли равон тахминан соати 01:30  ҳангоми гузаронидани амалиёти гумрукӣ аз ҷониби кормандони Раёсати минтақавии гумрукӣ дар вилояти Суғд дар роҳи мошингарди самти Ҷаббор Расулов — Хуҷанд дар ҳудуди ҷамоати деҳоти Галамайдони ноҳияи  Бобоҷон Ғафуров воситаҳои нақлиётии тамғаҳои «Зил» рақами қайди давлатиашон 0324DD 02  ва 0324DО 02 барои азназаргузаронӣ боздошт шуд.
Тавре аз Хадамоти гумруки назди Ҳукумати Ҷумҳурии Тоҷикистон хабар доданд,  ҳангоми гузаронидани муоинаи гумрукӣ дар бордони воситаҳои нақлиётии зикршуда ба миқдори 4 адад дастгоҳи барқтаъминкунандаи намуди «Трансформатор»-и тавоноияш 1000 кВА ва 4 адад дастгоҳи барқтаъминкунандаи намуди «Трансформатор»-и тавоноияш  400 кВА муайян карда шуд.
Ин миқдор мол ба шаҳрванд  Р.Р., соли таваллудаш 1978, истиқоматкунандаи ноҳияи Спитамен тааллуқ дошта, номбурда онро бидуни назорати гумрукӣ, ғайриқонунӣ аз Ҷумҳурии Қирғизистон ба қаламрави Ҷумҳурии Тоҷикистон  ворид намудааст.
Мувофиқи хулосаи филиали Суғдии Маркази ҷумҳуриявии экспертизаҳои судӣ ва криминалистикаи Вазорати адлияи Ҷумҳурии Тоҷикистон арзиши умумии ин миқдор молҳо 208  ҳазору 32  сомониро ташкил медиҳад.
Аз  рӯи ҳолати мазкур нисбати шаҳрванд Р. Р. бо моддаи 289 қисми 1-и КҶ ҶТ парвандаи ҷиноятӣ оғоз шуда, аз рӯи тобеияти тафтишотӣ  ба Прокуратураи вилояти Суғд  фиристода шуд.