Пешвои миллат: «Дини мубини ислом таълимоти созанда ва омӯзанда дорад»

Душанбе, 06.07.2016 /АМИТ «Ховар»/. Президенти кишвар дар Паёми табрикӣ ба  муносибати иди Рамазон аз таълимоти созандаи дини мубини ислом ёдовар шуда, зикр намуд: «Дар шароити давлати озоди демократӣ ва дунявӣ мо имрӯз имкон дорем, ки таълимоти созандаи дини мубини исломро, бахусус, доир ба тарғиби дӯстиву муҳаббат ва кумаку дастгирии байниҳамдигарӣ дар байни тамоми афроди ҷомеа густариш диҳем».
Дар идомаи табрикот ба сокинони ҷумҳурӣ Пешвои миллат муҳтарам Эмомалӣ Раҳмон оид ба дастовардҳои истиқлолият ва гиромидошти сулҳу суботи мамлакат ёдовар шуда гуфт: «Расидан ба қадри неъмат ва ба ҷо овардани шукронаи он аз ҷумлаи фазилату ҳикматҳои ҷовидонии фарҳанги милливу динии мардуми куҳанбунёди мо мебошад. Яъне ҳамаи маросиму ойинҳои миллии мо, ба шумули иди саиди Фитр бароямон рамзи барҷастаи шукрона аз неъматҳои истиқлолияту озодӣ, сулҳу субот, оромиву ободии кишвар ва аз рӯйи имону эътиқод дӯст доштани Ватан ба шумор мераванд».