Шаҳрвандони ҷумҳурӣ ба кумаки кормандони Хадамоти муҳоҷират ниёз доранд

Душанбе, 26.07.2016. /АМИТ «Ховар»/. Шаҳрвандони ҷумҳурӣ ба кумаку дастгирӣ ва маслиҳатҳои муфиди кормандони шуъбаи баҳисобгирӣ ва хизматрасонӣ ба муҳоҷирон дар ҶСК «Фурудгоҳи байналмилалии Душанбе» ва КВД «Истгоҳи роҳи оҳани шаҳри Душанбе»-и раёсати Хадамоти муҳоҷират дар шаҳри Душанбе ниёз доранд, иттилоъ доданд аз Хадамоти мазкур.
Дар ҳар як вохӯрӣ бо сокинони кишвар доир ба хатарҳои шомил шудан ба ҳар гуна ҳизбу ҳаракатҳо, қоидаҳои муҳоҷирати бехатар, будубоши муҳоҷирони меҳнатӣ дар хориҷа, воридшавӣ ба кишвари қабулкунанда, тарзу роҳҳои гирифтани патент, дастрас намудани полиси суғуртаи тиббӣ, гирифтани маълумотномаи тиббӣ доир ба надоштани касалиҳои сироятӣ ва тарзи супоридани тест дар марказҳои тестсупории Федератсияи Русия ва шаҳри Душанбе, ки ҳуқуқи додани сертификат доранд, маълумот пешниҳод карда мешавад.
«Яке аз масъалаҳои мубрами рӯз, ки моро дар ташвиш овардааст, ин аз тарафи муҳоҷирони меҳнатӣ надонистани қонунҳои амалкунанда ва ба қадри кофӣ надонистани забони русӣ мебошад. Дар айни замон аз тарафи кормандони шуъба ба ҳамаи муроҷиаткунандагон маълумот дар бораи қонунгузории Федератсияи Русия оид ба муҳоҷират, будубоши онҳо дар асоси талаботи қонунгузории Федератсияи Русия тавсияҳо дода мешаванд»,-зикр намуд манбаъ.