«Тарзи ҳаёти солим-интихоби мо!»: 30 июл дар тамоми кишвар Марафони велосипедронӣ баргузор мегардад

Душанбе, 27.07.2016. /АМИТ «Ховар»/. 30 июли соли 2016 соати 07:00 дар қаламрави кишвар Марафони саломатии велосипедронӣ бо иштироки оммаи васеи мардум баргузор мегардад.
Чорабинӣ бо ибтикори Кумитаи ҷавонон, варзиш ва сайёҳии назди Ҳукумати ҶТ ва Федератсияи футболи Тоҷикистон ташкил шуда, ба ҷашни 25-солагии Истиқлолияти давлатии Ҷумҳурии Тоҷикистон ва рушди оммавияти варзиши намуди велосипедронӣ дар кишвар бахшида шудааст.
Макони оғоз ва баргузорӣ:
шаҳри Душанбе аз Наврӯзгоҳи пойтахт то Чорбоғ; шаҳри Хоруғ аз даромадгоҳи шаҳри Хоруғ то майдони Исмоили Сомонӣ; шаҳри Хуҷанд  Ҳавзи шиноварӣ, кӯчаи Сирдарё, пули Ҷашнӣ, майдони Парчами миллӣ; Қӯрғонтеппа: ноҳияи Дустӣ (саҳни маркази ҷавонон) то маркази шаҳри Қӯрғонтеппа, назди муҷассамаи Исмоили Сомонӣ; Кӯлоб: аз ноҳияи Восеь (аз майдони муҷассамаи шуриши Восеъ) то майдони Парчами миллии шаҳри Кӯлоб; ноҳияи Рашт: деҳаи Сари пул то ҷамоати деҳоти Каланак;
Иштироки фаъолонаи тамоми хоҳишмандон — велосепедронҳо дар чорабинии мазкур нишонаи таҳкими тарзи ҳаёти солим ва шукргузорӣ аз иттиҳоду сарҷамъӣ ва иқболи миллат хоҳад буд.
Тарзи ҳаёти солим-интихоби мост!