Ҳамоиши «Китоби «Шоҳнома» ва «Тоҷикон дар оинаи таърих»-ро мехонем» дар Кӯлоб ҷамъбаст гардид

Кӯлоб, 23.08.2016. /АМИТ «Ховар»/. Дар боғи фарҳангӣ-фароғатии шаҳри Кӯлоб бо ташаббуси Кумитаи иҷроияи Ҳизби халқии демократии Тоҷикистон дар шаҳри Кӯлоб таҳти унвони «Китоби «Шоҳнома»-и ҳаким Абулқосим Фирдавсӣ ва китоби «Тоҷикон дар оинаи таърих»-и Асосгузори сулҳу Ваҳдати миллӣ-Пешвои миллат муҳтарам Эмомалӣ Раҳмонро мехонем!» чорабинии сиёсию фарҳангӣ вобаста ба ҷамъбасти ҳамоиши ҳизбӣ баргузор шуд.
Дар ҷамъомад зикр гардид, ки ҳамоиши мазкур бахшида ба 25-солагии Истиқлолияти давлатии Ҷумҳурии Тоҷикистон аз моҳи марти соли 2016 оғоз гардида, то имрӯз дар ҳамаи корхонаву муассисаҳои шаҳри Кӯлоб дар сатҳу сифати баланд доир шуд. Иштироки фаъоли сокинони шаҳри Кӯлоб, махсусан ҷавонон дар ҳамоиши мазкур баёнгари он буд, ки ба мақсадҳои созандаи худ дар роҳи тақвияти худшиносии миллии ҷомеа хеле наздик шудаем ва чунин иқдомҳо бояд бештар роҳандозӣ карда шаванд, то дар ҷисми ҷомеа ҳисси ватанпарастӣ ва ифтихори миллӣ бештар бедор гардад, зеро ин ва дигар иқдомҳои созанда дар боз кардани чашми худшиносиву худогоҳии ҷомеа нақши калидӣ доранд.
Аз тарафи ҳайати тадорукот иштирокчиёни фаъоли ҳамоиш эълон карда шуда, ҷои аввал ба Донишгоҳи давлатии Кӯлоб, ҷои дуюм ба Коллеҷи санъати шаҳри Кӯлоб ва ҷои сеюм ба Коллеҷи милитсияи шаҳри Кӯлоб муносиб дониста шуд.
Ба дигар фаъолони чорабинӣ Сипоснома, Ифтихорнома ва туҳфаҳои Кумитаи иҷроияи Ҳизби халқии демократии Тоҷикистон дар шаҳри Кӯлоб супорида шуд.
Дар қисмати фарҳангии чорабинӣ сурудҳои ватанпарастона, муколамаҳо аз китобҳои «Шоҳнома» ва «Тоҷикон дар оинаи таърих», намоишномаи театрии «Фирдавсӣ» ва сюитаи рақсиву овозӣ таҳти унвони «Тоҷикистони соҳибистиқлол» намоиш дода шуданд.