Дар ноҳияи Б. Ғафуров 60 нафар кӯдакони имконияташон маҳдуд ба боғча фаро гирифта мешаванд

Душанбе, 27.08.2016 /АМИТ «Ховар»/. Дар назди кӯдакистони рақами 10-и ҷамоати деҳоти Хистеварзи ноҳияи Бобоҷон Ғафуров сохтмони бинои иловагӣ оғоз гардида, он барои ба таълиму тарбия фаро гирифтани 3 гурӯҳи кӯдакони имконияташон маҳдуд дар назар дошта шудааст.

Бинои иловагии боғчаи бачагона тибқи лоиҳа барои то 60 нафар кӯдакон пешбинӣ шуда, аз синфхонаҳои омӯзишӣ, толори машғулиятҳою баргузории чорабиниҳо ва дигар ҳуҷраҳои истироҳатӣ иборат мебошад. Бино бо харҷи зиёда аз 500 ҳазор сомонӣ бунёд шуда, ҳоло 65 фоизи корҳои сохтмонӣ аз тарафи сохтмончиёни маҳаллӣ анҷом дода шудаанд.

Дар айни замон ба маблағи 300 ҳазор сомонӣ корҳо анҷом ёфта, корҳои пардоздиҳӣ, рангу бор ва муҷаҳҳазнамоӣ ҷараён доранд.