Дар Тоҷикистон Фестивали фарҳангии Ҳиндустон барпо мешавад

Душанбе, 20.08.2016. /АМИТ «Ховар»/. Ба муносибати 25-солагии Истиқлолияти давлатии Ҷумҳурии Тоҷикистон бори аввал дар кишвари мо Фестивали фарҳангии Ҳиндустон доир мегардад. Дар ин бора 19 августи соли 2016 дар мулоқоти вазири фарҳанги Ҷумҳурии Тоҷикистон Шамсиддин Орумбекзода бо Сафири Ҷумҳурии Ҳиндустон дар Ҷумҳурии Тоҷикистон Сомнатх Гош, ки дар Душанбе баргузор гардид, иттилоъ дода шуд.
Зимни мулоқот ҷонибҳо дар бораи робитаҳои фарҳангии ду кишвар, тарғиби маданияту фарҳанги ба ҳам шабеҳи тоҷику ҳинд ва дар ин замина, боз таҳкими зиёдтар бахшидан ба ҳамкории дуҷониба ибрози андеша намуданд.
Сомнатх Гош иттилоъ дод, ки ҷониби Ҳиндустон тасмим гирифтааст ба муносибати 70-солагии Истиқлолияти Ҷумҳурии Ҳиндустон, 25-солагии Истиқлолияти Ҷумҳурии Тоҷикистон, инчунин 25-солагии ба роҳ мондани робитаҳои дипломатии Тоҷикистону Ҳиндустон Фестивали фарҳангии Ҳиндустонро дар Тоҷикистон баргузор созад. Ў аз вазири фарҳанги Тоҷикистон хоҳиш кард, ки дар ташкили фестивали мазкур мусоидат намояд.
Вазири фарҳанги Тоҷикистон Шамсиддин Орумбекзода иброз дошт, ки фарҳанг ва маданияти Ҳинд байни мардуми тоҷик маҳбубияти беназир дорад. Ў гуфт, ки ташкили чорабиниҳои фарҳангӣ на танҳо дар пойтахт, балки дар дигар шаҳру манотиқ низ боиси боз ҳам ғанӣ гардонидани фазои фарҳангӣ хоҳад гашт. Инчунин ташкили барномаҳои консертии муштарак бо иштироки сарояндагони муосир, намоишҳои театрӣ аз ҷониби ҳаводорони санъат хуш пазируфта хоҳанд шуд.
Ҷонибҳо оид ба бозомӯзии мутахассисони тоҷик дар курсҳои кӯтоҳмуддати барномаи ITEC ва таҳсили донишҷӯёни тоҷик дар Ҳиндустон низ гуфтушунид намуданд. Вазири фарҳанги Тоҷикистон таклиф кард, ки хуб мебуд, агар ҷониби Ҳиндустон таҳсили донишҷӯёни тоҷикро дар риштаҳои коргардонӣ ва актёрӣ бештар дастгирӣ мекард.
Таклифҳо бо камоли майл аз ҷониби тарафҳо пазируфта шуданд. Ҷонибҳо изҳор доштанд, ки минбаъд муносибатҳои фарҳангии Тоҷикистон ва Ҳиндустон боз ҳам рушд хоҳанд ёфт.