Дастаи мунтахаби Тоҷикистон ба бозии рафиқона бо Фаластин омодагӣ мебинад

Душанбе, 31.08.2016. /АМИТ «Ховар»/. Дирӯз нахустин марҳилаи омодагии дастаи мунтахаби Тоҷикистон оид ба футбол ба вохӯрии байналмилалии рафиқона бо тими мунтахаби Фаластин баргузор шуд. Баъд аз бозӣ бо тими мунтахаби Сурия, ки дар варзишгоҳи муҳташами «20- солагии Истиқлолияти Тоҷикистон», воқеъ дар шаҳри Хуҷанди вилояти Суғд бидуни гол, мусовӣ анҷом пазируфт, дастпарварони Ҳаким Фузайлов баъд аз як рӯзи истироҳат ба машғулияти таълимию тамринӣ оғоз намуданд. Бо назардошти он, ки бозӣ бо тими Фаластин дар майдони маснуъ дар Хервон сурат мегирад, дастаи мунтахаби Тоҷикистон то рӯзи шанбе машғулияти хешро дар майдони эҳтиётии сунъии Варзишгоҳи марказии ҷумҳуриявӣ барпо мекунад.
Дастаи мунтахаби Тоҷикистон ба бозии байналмилалии рафиқона бо тими мунтахаби миллии Фаластин дар ҳайати 22 нафар омодагӣ мегирад. Нимҳимоятгари бошгоҳи «Дунав»-и Булғористон, футболбози мумтозу моҳири тоҷик Нуриддин Давронов дар ин бозӣ ширкат хоҳад кард. Фардо легионери дигари тоҷик, бозингари дастаи «Локомотив»-и Булғористон Парвизҷон Умарбоев низ ба ҳайати дастаи мунтахаб мепайвандад. Бо иллати ҷароҳат бардоштани ҳимоятгари дастаи «Тараз»-и Қазоқистон Давронҷон Эргашев номи ӯ аз рӯйхати ҳайати асосӣ бардошта шудааст.
Дастаи мунтахаби Тоҷикистон шаби шанбе, сеюми сентябр озими Фаластин хоҳад шуд. Ҳайати дастаи мунтахаби Тоҷикистон тавассути хатсайри Душанбе Дубай-Уммон парвоз намуда, аз Уммон тариқи автобус ба Исроил меравад. Дидори рафиқонаи тимҳои Тоҷикистону Фаластин 6 сенябри соли равон дар варзишгоҳи Дураи шаҳри Хервон дар назар аст.
Ёдовар мешавем, ки дар ҳамин замини сабзпӯш моҳи феврали ҳамин сол вохӯрии марҳилаи плей-оффи Ҷоми конфедератсияи футболи Осиё миёни тимҳои Аҳлӣ Ал Халилӣ ва барандаи нишони нуқраи Тоҷикистон- дасти Хуҷанд баргузор шуда буд.