Эмомалӣ Раҳмон: «Барои рушди маорифи пойтахт дар 25 соли соҳибистиқлолӣ зиёда аз 1 миллиард сомонӣ равона гардидааст»

Душанбе, 30.08.2016./АМИТ «Ховар»/. Имрӯз Асосгузори сулҳу Ваҳдати миллӣ -Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни суханронӣ дар маросими ифтитоҳи мактаби нави таҳсилоти умумӣ дар шаҳри Душанбе зикр намуд, ки: «Соли ҷорӣ аз буҷети давлат ба соҳаи маориф зиёда аз 3 миллиард сомонӣ пешбинӣ гардидааст, ки нисбат ба соли гузашта 231 миллион ё 10 фоиз ва дар муқоиса ба даҳ соли пеш, яъне соли 2006 қариб 13 баробар зиёд мебошад.
Қобили зикр аст, ки дар тӯли солҳои истиқлол дар шаҳри Душанбе аз ҳисоби ҳамаи сарчашмаҳои маблағгузорӣ даҳҳо муассисаи нави таҳсилоти умумӣ ва биноҳои иловагӣ барои 45 ҳазор ҷойи нишаст сохта, ба истифода дода шудаанд.
Тибқи таҳлилҳо дар давоми 25 сол барои рушди маорифи пойтахт ва фароҳам овардани шароити таълиму тарбия зиёда аз 1 миллиард сомонӣ равона гардидааст».
Президенти кишвар ҳамчунин иброз дошт, ки: « Чанде пеш ба ифтихори истиқболи ҷашни 25 — солагии истиқлолияти давлатӣ ду боғчаи бачагонаи хусусӣ барои 250 ҷой дар маҳаллаи Зарафшон ба истифода дода шуда, рӯзҳои наздик ду кӯдакистони хусусии дигар дар маҳаллаи мазкур барои 350 ҷой мавриди баҳрабардорӣ қарор дода мешавад».