Хонандагон танҳо баъди хатми муассисаҳои таълимӣ ва гирифтани шаҳодатномаи хатм метавонанд барои таҳсил ба Амрико сафар намоянд

Душанбе, 23.08.2016. /АМИТ «Ховар»/. Имрӯз зимни вохӯрии вазири маориф ва илми Ҷумҳурии Точикистон Нуриддин Саид бо Сафири Фавқулода ва Мухтори Иёлоти Муттаҳидаи Амрико дар Ҷумҳурии Тоҷикистон Элизабет Миллард ҷонибҳо вобаста ба рушди ҳамкорӣ, хусусан, оид ба такмилу омӯзиши забони англисӣ, такмили ихтисоси омӯзгорони муассисаҳои таҳсилоти олии касбӣ ва фаъолияти барномаи FLEX мубодилаи афкор намуданд.
Нуриддин Саид зикр кард, ки имрӯзҳо дар ҷумхурӣ «Барномаи давлатии такмил ва омӯзиши забонҳои русӣ ва англисӣ дар Ҷумҳурии Тоҷикистон» амалӣ гардида истодааст, ки иҷрои бандҳои он зери назорати масъулини соҳа мебошад. Гузашта аз ин, вобаста ба имконот ҳамасола омӯзгорони муассисаҳои таҳсилоти миёнаи умумӣ аз такмили ихтисос гузаронида мешаванд.
Сафири Фавқулода ва Мухтори Иёлоти Муттаҳидаи Амрико дар Ҷумҳурии Тоҷикистон Элизабет Миллард иттилоъ дод, ки вобаста ба такмили ихтисоси омӯзгорони муассисаҳои таҳсилоти олии касбӣ метавонанд бо даъват намудани мутахассис аз Иёлоти Муттаҳидаи Амрико курсҳои такмили ихтисосро дар яке аз донишгоҳҳо ба роҳ монанд.
Ҷиҳати амалисозии барномаи FLEX ҷонибҳо ба мувофиқа расиданд, ки хонандагон танҳо баъд аз хатми муассисаҳои таълимӣ ва гирифтани шаҳодатномаи хатм метавонанд барои таҳсил ба Иёлоти Муттаҳидаи Амрико сафар намоянд.