«Имконияти нави ҳамкориҳои Созмони ҳамкории Шанхай»-аввалин лагери ҷавонони СҲШ

Душанбе, 20.08.2016 /АМИТ «Ховар»/. Аз 21 то 29 августи соли 2016 дар Ҷумҳурии Мардумии Чин аввалин лагери ҷавонони Созмони ҳамкории Шанхай таҳти унвони «Имконияти нави ҳамкориҳои Созмони ҳамкории Шанхай» баргузор мегардад. Дар кори он намояндагони давлатҳои аъзои СҲШ – Тоҷикистон, Чин, Русия, Қазоқистон, Қирғизистон, Узбекистон, давлатҳои нозири СҲШ – Афғонистон, Беларус, Ҳиндустон, Муғулистон, Эрон ва Покистон иштирок менамоянд. Ҷумҳурии Тоҷикистонро дар лагери ҷавонон 15 нафар, аз ҷумла намояндагон аз Дастгоҳи иҷроияи Президенти Ҷумҳурии Тоҷикистон, Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон, Агентии миллии иттилоотии Тоҷикистон «Ховар»-и назди Ҳукумати Ҷумҳурии Тоҷикистон ва дигар ҷавонони фаъол намояндагӣ хоҳанд кард.
Умед аст, ки иштирок дар кори якумин лагери ҷавонони СҲШ барои ҷавонони кишвари мо имкониятҳои нави ҳамкориро бо дигар ҷавонон, аз ҷумла бо намояндагони ҷавонони СҲШ бештар месозад.