Муроҷиати шаҳрвандон нисбат ба мақомоти судӣ афзудааст

Душанбе, 04.08.2016. /АМИТ «Ховар»/. «Муроҷиати шаҳрвандон ба мақомоти Ваколатдор оид ба ҳуқуқи инсон дар Ҷумҳурии Тоҷикистон нисбат ба ҳамин давраи соли гузашта 680 адад ё қариби 30 % афзудааст»,- мегӯяд Зариф Ализода, Ваколатдор оид  ба ҳуқуқи инсон дар Ҷумҳурии Тоҷикистон.
Тамоюли афзоиши  муроҷиати шаҳрвандон ба мақомоти Ваколатдор оид ба ҳуқуқи инсон дар Ҷумҳурии Тоҷикистон ба баланд гардидани маърифати ҳуқуқии шаҳрвандон рабт дода мешавад.
Муроҷиатҳои аз сӯи шаҳрвандон дар ин давра ба мақомоти Ваколатдор оид ба ҳуқуқи инсон ворид гардида, беш аз 2200 ададро ташкил дода, аз он 1882 тоаш ба таври шифоҳӣ ва 457 ададаш  хаттӣ  ба қайд  гирифта шудааст.
Бештари муроҷиати шаҳрвандон ба масъалаҳои  манзил, ҳуқуқ ба моликият, ҳуқуқи инсон ва мақомоти ҳифзи ҳуқуқ ва таъминоти иҷтимоӣ иртибот доранд.
Дар муроҷиатҳои хаттӣ ва шифоҳии шаҳрвандон, ки ба  мақомоти Ваколатдор оид ба ҳуқуқи инсон ворид гардидаанд,  нисбат ба қарор ё амали мақомоти ҳифзи ҳуқуқ  шикоят карда мешаванд. Аз ҷумла,  нисбат ба мақомоти судӣ 40 муроҷиат, прокуратура  2 адад,  мақомоти корҳои дохилӣ 15 адад, нисбат ба мақомоти амнияти миллӣ 4 адад, ҳуқуқ ба муҳокимаи одилонаи судӣ 19 муроҷиат, ҳуқуқ ба муроҷиат 21 адад,  ҳуқуқ ба манзил 27 адад  ва дар  масъалаи таъминоти иҷтимоӣ 14 муроҷиат рост меояд. Бархе аз ин муроҷиатҳои шаҳрвандон аз ҷониби мақомоти марбута қонеъ гардонида шудааст.