Нахустин Бозиҳои миллии варзишгарони маъюб бахшида ба 25- солагии Истиқлолият доир гардид

Душанбе, 25.08.2016. /АМИТ «Ховар»/. 24 августи соли равон дар майдончаи «Боғи Пойтахт» бахшида ба 25-солагии Истиқлолияти давлатии Ҷумҳурии Тоҷикистон нахустин Бозиҳои миллии варзишгарони маъюб бо аробачаи маъюбӣ баргузор шуд.
Дар чорабинӣ намояндагони Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон, Кумитаи миллии параолимпӣ, ташкилоти байналмилалии «Operation Mercy», Иттиҳодияи миллии маъюбони Тоҷикистон зикр намуданд, ки Ҳукумати Ҷумҳурии Тоҷикистон баҳри дастгирии маъюбон тамоми тадбирҳоро андешида, онҳо таҳти ғамхории доимии давлат ва ҳукумат қарор доранд.
Дар Бозиҳои миллии варзишгарони маъюб ду тим аз вилояти Суғд ва ду тим аз шаҳри Душанбе иштирок намуда, аз намуди баскетбол, волейбол дар аробачаҳои маъюбӣ тамоми ҳунару маҳорати хешро намоиш доданд. Гулдухтарон дар аробачаҳои маъюбӣ бо либосҳои миллӣ чунон бо маҳорати баланд рақс намуданд, ки тамошобинонро ба ваҷд оварданд.
Дар оянда Иттиҳодияи миллии маъюбони Тоҷикистон бо Федератсияи баскетболи Тоҷикистон ҳамкориро зич намуда, ба бозиҳои миллии варзишгарони маъюб аз тамоми шаҳру ноҳиҳои ҷумҳурӣ нафарони имконияташон маҳдуд ҷалб карда мешаванд.
Дар назар аст, ки дар оянда тими мунтахаби Тоҷикистон таъсис дода мешавад ва онҳо дар бозиҳои параолимпии байналмилалӣ ширкат намуда, шаъну шарафи ватани азизамонро боло мебардоранд.