Прокуратураи генералӣ: 68 тонна маҳсулоти хӯроквории кӯдаконаи пастсифат аз фурӯш боздошта шуд

Душанбе, 04.08.2016. /АМИТ «Ховар»/. «Пешгирии воридшавии  молу маҳсулоти пастсифат, хусусан маводи хӯрока, ки  аз ҷониби баъзе тоҷирон ба Тоҷикистон оварда мешавад ва барои саломатии  инсон хатарнок аст, яке аз масъалаи муҳим ба шумор меравад. Прокуратураи генералӣ дар ин самт тадбирҳои зарурӣ андешида, ҳолатҳои зиёди ба фурӯш баровардани маҳсулоти барои саломатӣ зарароварро ошкор ва пешгирӣ намуд».
Ин нуқтаро имрӯз дар нишасти матбуотӣ прокурори генералии Ҷумҳурии Тоҷикистон Юсуф Раҳмон иброз дошт ва илова намуд, ки дар нимаи аввали соли равон  дар яке аз мағозаҳои хӯрокворӣ 68 тонна маҳсулоти хӯроквории кӯдаконаи пастсифат ба маблағи 500 ҳазор сомонӣ ва 0,5 тонна гӯшти чорвои муҳлати истеъмолаш гузашта ба маблағи 300 ҳазор сомонӣ дарёфт ва аз фурӯш боздошта шуд.
Ҳамчунин дар ин самт 140 санади эътиноии прокурорӣ татбиқ карда шуда, 850 парвандаи ҳуқуқвайронкунии маъмурӣ ва 133 парвандаи ҷиноятӣ оғоз гардид.