Прокуратураи генералӣ зиёда аз 1000 гектар майдони ғайриқонунӣ ғасбшударо ошкор кард

Душанбе, 06.08.2016. /АМИТ «Ховар»/. «Назорати риояи қатъии қонунгузорӣ вобаста ба самаранок ва оқилона  истифода бурдани замин яке аз самтҳои асосии фаъолияти мақомоти прокуратура буда, доимо дар ин самт санҷишҳо гузаронида мешаванд»,- гуфт Юсуф Раҳмон прокурори генералии Ҷумҳурии Тоҷикистон  зимни нишасти хабарӣ.
Ба иттилои Юсуф Раҳмон, дар моҳи июли соли равон аз ҷониби кормандони мақомоти прокуратура дар ноҳияи Рӯдакӣ зиёда аз 1000 га майдони ғайриқонунӣ ғасбшуда ошкор карда шуд. Хариду фурӯши ғайриқонунии замин аз ҷониби шахсони гунаҳгор ба маблағи зиёда аз 900 ҳазор доллар муайян гардида, 5 нафар ба ҳабс гирифта шуд.
Дар якчанд шаҳру ноҳияҳои дигар санҷишҳои прокурорӣ гузаронида шуда, қонуншиканиҳо ошкор ва чораҳои қатъии прокурорӣ андешида шуданд. Дар шашмоҳаи аввали соли равон вобаста ба риояи қонунгузории замин 1309 санади   эътиноӣ бароварда шуда, 2172 нафар ба ҷавобгарии интизомӣ, маъмурӣ ва моддӣ кашида шуд. 556 парвандаи ҷиноятӣ оғоз ва 7269 га замин ба ҳолати аввала баргардонида шуд.