Сарвазири мамлакат бо ҳолати корҳои омодагӣ ба давраи тирамоҳу зимистони солҳои 2016-2017 дар Маркази барқу гармидиҳии Душанбе-2 шинос шуд

Август 13, 2016 13:37

Душанбе, 13.08.2016. /АМИТ «Ховар»/. Имрўз Сарвазири мамлакат Қоҳир Расулзода бо ҳолати корҳои омодагӣ ба давраи тирамоҳу зимистони солҳои 2016-2017 дар  Маркази барқу гармидиҳии Душанбе-2 ва инфрасохтори зарурии он шинос шуд.

Зимни шиносоӣ  Сарвазири мамлакат ва ҳайати ҳамроҳонаш нахуст аз маҳалли бунёди нуқтаи бузурги тақсимоти гармӣ дидан кард. Тавре иттилоъ дода шуд, корҳои сохтмони маркази тақсимоти гармии Маркази барқу гармидиҳии Душанбе-2 аллакай шуруъ гардида, аз ин баъд ба таври шабонарўзӣ идома меёбад. Таҷҳизоти зарурӣ барои бунёди маркази тақсимоти гармӣ дархост шуда, қарор аст, то даҳаи дуввуми моҳи август ба ҷумҳурӣ ворид карда шавад. Сипас, Сарвазири мамлакат аз мавзеи сохтмони анбори нигоҳдории ангишт барои фаъолияти Маркази барқу гармидиҳии Душанбе-2, ки аз ҷониби Ҷамъияти масъулияти маҳдуди «Нуроб» бунёд мешавад, боздид ба амал оварда, бо рафти корҳои сохтмонии он аз наздик шинос шуд. Мувофиқи иттилои мавҷуда корҳои сохтмони анбор барои нигоҳдории беш аз 120 ҳазор тонна ангишт дар ин ҷо ба андозаи 55 фисад анҷом дода шудааст.

Сохтмони марҳилаи дуюми Маркази  барқу  гармидиҳии Душанбе-2 низ дар айни замон бо суръати баланд идома дошта, дастандаркорони он ният доранд, ки мувофиқи нақша ва дар муҳлатҳои таъиншуда ин иншооти ҳаётан муҳимро мавриди баҳрабардорӣ қарор диҳанд.

Хотиррасон бояд кард, ки лоиҳаи сохтмони  марҳилаи дуюми Маркази барқу гармидиҳии Душанбе-2 бо иқтидори 300 мГВ дар асоси Созишномаи ҳамкории Ҳукумати Ҷумҳурии Тоҷикистон ва Ҳукумати  Ҷумҳурии Мардумии Чин амалӣ мегардад.

Дар анҷоми шиносоӣ таҳти раёсати Сарвазири мамлакат дар Маркази барқу гармидиҳии Душанбе-2 ситоди сайёри корӣ баргузор шуд, ки дар он роҳбарони вазорату идораҳои дахлдор ва масъулони ташкилоту иттиҳодияҳои сохтмонӣ барои иҷрои босифат ва саривақтии корҳои нақшавии сохтмонӣ, насбу васли таҷҳизоти дастрасшуда, фароҳамсозии шароити мувофиқ барои захираи ангиштсанг, таҳкими корҳои бунёди хаттҳои интиқоли гармӣ ва нуқтаҳои гармидиҳанда ва вусъати корҳои фаҳмондадиҳӣ дар миёни аҳолии пойтахт вобаста ба  омодагӣ ва андешидани чораҳои зарурӣ  барои  пайваст намудани  биною  иншооти маъмурию  истиқоматӣ  ба  шабакаҳои мутамаркази  гармидиҳии шаҳри Душанбе  вазифадор карда шуданд.

Тибқи нақша, то оғози давраи тирамоҳу зимистони солҳои 2016-2017 дар пойтахти мамлакат 1285 иншооти таъиноти гуногун ва манзилҳои истиқоматӣ ба хаттҳои интиқоли гармӣ пайваст карда мешаванд. Корҳои вобаста ба таъминоти пойтахти мамлакат шаҳри Душанбе  бо гармӣ айни замон дар иншооти Маркази барқу гармидиҳии Душанбе-1  ва Душанбе-2, инчунин дегхонаҳои Ғарбӣ ва Шарқӣ бо маром идома дорад. Қарор аст, ки тамоми иқтидорҳои вобаста ба таъминоти гармӣ  дар пойтахти мамлакат шаҳри Душанбе дар асоси Қарори Ҳукумати Ҷумҳурии Тоҷикистон «Дар бораи омодагӣ ва дар сатҳи зарурӣ гузаронидани давраи тирамоҳу зимистони солҳои 2016-2017» то якуми октябри соли равон барои фаъолияти муназзам омода карда шаванд.

 

Август 13, 2016 13:37

Хабарҳои дигари ин бахш

Дар шаҳри Панҷакент ҳашари экологии «Тозагии маҳал» гузаронида шуд
Имрӯз дар Тоҷикистон ҳаво тағйирёбандаи бебориш мешавад
ТАҚВИМИ АМИТ «ХОВАР»: имрӯз 4 август, душанбе, 216-умин рӯзи соли 2025 аст
Имрӯз дар Кумитаи ҳолатҳои фавқулода ва мудофиаи гражданӣ, Агентии инноватсия ва технологияҳои рақамӣ, Хадамоти зиддиинҳисорӣ ва Ваколатдор оид ба ҳуқуқи инсон нишасти матбуотӣ баргузор мегардад
Кумитаи рушди сайёҳӣ бахшида ба Рӯзи ҷаҳонии сайёҳӣ озмун эълон менамояд
Дар Хоруғ даври шаҳрии Озмуни ҷумҳуриявии «Беҳтарин ҳамсар» баргузор гардид
Имрӯз дар Тоҷикистон ҳарорати ҳаво ба 39 дараҷа мерасад
Волейбол дар Вилояти Мухтори Кӯҳистони Бадахшон аз ҷиҳати тиҷоратӣ дастгирӣ ёфт
4 август дар Кумитаи ҳолатҳои фавқулода ва мудофиаи гражданӣ, Агентии инноватсия ва технологияҳои рақамӣ, Хадамоти зиддиинҳисорӣ ва Ваколатдор оид ба ҳуқуқи инсон нишасти матбуотӣ баргузор мегардад
Имрӯз дар Тоҷикистон ҳавои тағйирёбанда дар назар аст
1 август дар ноҳияҳои кӯҳии Тоҷикистон хавфи сар задани селҳои пиряхӣ боқӣ мемонад
Имрӯз дар якчанд кумитаю муассиса нишасти матбуотӣ баргузор мегардад