Суғд: Муҳайё Юсупова ғолиби озмуни вилоятии «Адрасбофи беҳтарин» гардид

Суғд, 06.08.2016. /АМИТ «Ховар»/. Дирӯз дар Кохи Рӯдакии маркази вилояти Суғд озмун-мусобиқаи вилоятии «Адрасбофи беҳтарин»  ҷамъбаст шуд ва ғолибон бо мукофотҳо сарфароз гардиданд.
Дар маросими супоридани Шоҳҷоиза ва мукофотҳо ба ғолибон раиси вилояти Суғд Абдураҳмон Қодирӣ иштирок намуд.
Озмун ба муносибати 25- солагии Истиқлолияти давлатии Ҷумҳурии Тоҷикистон ва тарғиби фарҳанги либоси миллӣ, эҳё ва рушди ҳунарҳои мардумӣ, истеҳсоли матои атлас ва адрас, дарёфти беҳтарин ҳунармандони ҳунарҳои дастии адрасбофӣ, бо ҷои кор таъмин намудани занону духтарон гузаронида шуд.
Дар озмун, ки се рўз идома ёфт, 40 нафар ғолибони даври аввал барои ишғоли ҷойҳои ифтихорӣ мубориза бурданд. Тибқи хулосаи ҳакамон Муҳайё Юсупова  бонуи ҳунарманд аз ноҳияи Бобоҷон Ғафуров соҳиби Шоҳҷоиза ва мукофоти пулӣ дар ҳаҷми 5000 ҳазор сомонӣ гардид.
Аз рӯи шарти «Бофандаи моҳир» ҷои аввалро Мамлакат Хоҷаева аз ноҳияи Бобоҷон Ғафуров,  ҷойҳои минбаъдаро Мунира Охунова аз шаҳри Исфара ва Хайринисо Маҳкамова аз ноҳияи Деваштич соҳиб шуданд.
Дар бахши «Сифати беҳтарин» мақоми аввал насиби Саломат Азизова аз ноҳияи Мастчоҳ гардид. Наргис Умматқулова аз ноҳияи Спитамен ва Наргис Ҷумъаева аз шаҳри Истаравшан мақомҳои баъдиро ишғол намуданд.
Дар бахши «Нақши беҳтарин» Назокат Ҳоҷиева аз шаҳри Хуҷанд ғолиб омад. Соҳиби ҷойҳои дуюму сеюм Барно Шехсаидова ва Каромат Турсунова, бонувони ҳунарманд аз Зафарободу Панҷакент шуданд.